Ilir Shaqiri do të martohet këtë fundjavë. Ai dhe partnerja e tij do i drejtohen altarit ditën e shtunë.
Burime bëjnë me dije se ai dhe partnerja e tij, Emanuela do të organizojnë një ceremoni tjetër dasme, pasi e para nuk ka qenë ashtu si ata e kishin ëndërruar.
Fituesi i edicionit të parë të “Big Brother Vip 1” ka zgjedhur ta kryejë ceremoninë në një restorant pranë bregdetit të qytetit të Durrësit.
Si duket, Iliri këtë herë do të ketë një ceremoni më të madhe, pjesë e gëzimit të tyre do të jenë më shumë se 100 të ftuar.
Pak muaj më parë në “Big Brother Vip 1” Iliri deklaroi se nuk kishte zhvilluar dasmë, por vetëm një ceremoni të thjeshtë martesore. Ceremonia e mbajtur në një bashki në Itali si dhe një darkë private me 14 persona duket se nuk ka qenë e mjaftueshme për Ilirin, i cili ka vendosur ta shohë dhe njëherë gruan e tij të veshur me të bardha.
Duket se balerini i njohur do ta çojë deri në fund adetin e Shqiptarit për të pasur një dasmë të madhe. Por sigurisht do të jetë një kujtim i bukur dhe special me bashkëshorten italiane Emanuelën, me të cilën ka edhe një vajzë, Emily.
