Jurgen Bala është një prej balerinëve më të njohur në Shqipëri, shpesh pjesë e formateve të suksesshme të kërcimit, përvec skenave të tjera, ndërsa prej disa vitesh ai është shpërngulur në SHBA, ku jeton dhe punon.
Sot ai ishte i ftuar në “Pardon My French” në Top Albania Radio, së bashku me partneren e tij të re të kërcimit, Megi Pojanon, me të cilën do të garojë në formatin e njohur “Dancing With the Stars”. Ndër të tjera, ato rrëfyen se ishte eksperienca e tyre si “cift” deri më tani në program, në prag të nisjes së transmetimit, por Jurgeni po ashtu foli edhe për pjesën e tij personale, largimin nga Amerika për t’u bërë pjesë e DWTS në Shqipëri.
Bala tregoi se si i kishte ardhur ftesa nga Top Channel dhe përse e la SHBA-në për t’u rikthyer, të paktën këto muaj:
“Që në fillim kur dëgjova se do të bëhej ‘DWTS’ isha shumë i emocionuar dhe doja të merrja pjesë se kjo gjëja më ka munguar. Dalja në televizor se në New York nuk kam dalje televizive. Më ka marrë malli për audiencën e Shqipërisë, kamera kur ndizet drita e kuqe. Unë jam shumë me energji dhe jam shumë zjarr, nuk e di si kanë marrë pjesë balerinët e tjerë kur e dinë që jam unë këtu.”
Ndërkohë, një nga balerinat e tjera profesioniste është dhe motra e tij Lori Bala, një emër i njohur i baletit shqiptar, por a e sheh Jurgeni atë si konkurente?
“Nuk e ndjej fare pjesën e konkurrencës të jem i sinqertë, madje është suport. Një arsye që unë jam kthyer është të qëndroj dhe pranë familjes. Nuk e shoh si konkurrente, e shoh si suportuese.“-u shpreh balerini i njohur, megjithëse edhe pak si konkurente duhet ta shohi, se vetëm njëri do të triumfojë në fund.
