Ja si do ta përcjellin Europianin, Top Channel & Supersport

Të gjithë presin me padurim muajin qershor ku kombëtarja jonë do të luajë për herë të parë në historinë e saj në një Europian. Biletat janë shitur tashmë, tifozët besnikë kanë prenotuar hotelet për të qenë çdo gjë gati në ndeshjen e parë të datës 11 qershor, në stadiumin e Lensit me kapacitet 35 mijë vende.

Top Channel dhe Supersport kanë siguruar ekskluzivitetin e trasmetimit televiziv, duke nisur kështu një maratonë emisionesh dhe trasmetimesh “live” për një mbulim sa më profesional.

Teleshikuesit që do ta ndjekin nga shtëpia “France 2016”, do kenë mundësi të shohin 31 ndeshje, mes tyre kombëtaren shqiptare, çerekfinalet, gjysmëfinalet dhe finalen.

Ndeshja e dytë për Shqipërinë është ajo ndaj Francës, e cila luhet më 15 qershor në Marsejë në orën 21:00. Kurse Zvicra do të luajë me Rumaninë po në të njëjtën ditë në orën 18:00 në Paris.

Ndeshjen e fundit në grup, Shqipëria e ka ndaj Rumanisë në Lion më 19 qershor, ku në të njëjtën orë luan Franca me Zvicrën.

Çdo ditë do ketë emisione para dhe pas ndeshjeve për të diskutuar pritshmëritë dhe analizat sportive. Në mbrëmje në orën 23:00, çdo ditë do të jetë “Procesi Sportiv” dedikuar plotësisht Europianit.

Ndërkohë në Francë do ketë gazetarë që do të ndjekin kombëtaren në çdo lëvizje gjatë gjithë qëndrimit duke sjellë materiale speciale që tifozët të mos humbasin asgjë.

Një studio e re do të ndërtohet posaçërisht për eventin, ndërsa nuk do mungojnë lidhjet direkte nga sheshi në Tiranë për ditët kur luan kombëtarja.

Pra mbetet vetëm ta shijojmë Europianin dhe ekipin tonë përfaqësues, i cili ka hyrë në histori me këtë kualifikim.

/ Top Channel

REKLAMA
loading...

KOMENTO

This site uses Akismet to reduce spam. Learn how your comment data is processed.