“Katrori i pushtetit” është seriali më i ri shqiptar që do të bëhet pjesë e programacionit të pasur të Tv Klan që prej 9 Janarit. Një serial i cili për herë të parë do të trajtojë çështjet pa i zbukuruar, një realitet i gazetarisë investigative në mediat shqiptare, por të pasqyruara nga sytë e tre vajzave protagoniste.
Producentja Sabina Kodra tregon për “Rudina” vizionin që do të shfaqë seriali, i cili ka bërë bashkë emra të njohur si Ema Andrea,Sara Smaja, Gentian Zenelaj, Romir Zalla, Eni Shehu etj.
Rudina Magjistari: Katrori i pushtetit le të themi që këndin e katërt e krijon media dhe janë tre vajza gazetare që e përfaqësojnë këtë pikë të katërt të katrorit. Është një pikë shumë e fuqishme, një pushtet i katërt i përfaqësuar vetëm nga tre gra. Pse keni zgjedhur tre gra për të përfaqësuar këtë pushtet në media.
Sabina Kodra: Po të shikojmë të gjitha redaksitë në Shqipëri, 75% e tyre janë gra dhe vajza që punojnë. Ato sigurisht që nuk janë në nivel drejtues, por atë punë voluminoze në tëë gjitha redaksitë e lajmeve në Shqipëri e bëjnë gratë dhe vajzat. Ato janë figura e margjinalizuar kryesisht për të cilat nuk flitet, nuk janë protagoniste, ato janë ato që duhet të punojnë, por ndërkohë janë ato që duhet të mbajnë një shoqëri të tërë në këmbë. Mbajnë familjen, mbajnë punën dhe për mua ishte me shumë interes që të flisnim për disa të vërteta të thjeshta, jo të jashtëzakonshme, nuk bëjmë çudira, por flasim për disa të vërteta të të përditshmes të rrëfyera nëpërmjet syve të këtyre tre grave dhe vajzave në breza të ndryshëm, me sfida të ndryshme, por me të vërteta të përbashkëta dhe mënyrën si ato përballen. Atë që bën seriali në vetvete nuk është gjë tjetër veçse rrëfen atë që është jeta jonë e përditshme dhe jam e bindur që të gjithë do e gjejnë veten, që nga fëmijët 12 vjeç dhe deri tek zonjat e zotërinjtë 80 vjeç.
