Kia EV6, suv elektrik e markës koreane (grupi Hyundai) u vlerësua si Makina e Vitit.
Me 279 vota, ajo lë pas Renault Megane E-Tech, me 265 vota dhe koreanen tjetër elektrike, Ioniq 5. Tre makina elektrike në tre vendet e para.
Çmimi Car of The Year 2022 jepet që prej vitit 1964 dhe konsiderohet çmimi më i rëndësishëm në botën e automjeteve, edhe pse zgjedhjet shpesh kanë qenë të diskutueshme, pasi ato iu jepen modeleve që nuk kanë regjistruar një numër të madh shitjesh.
Këtë vit ceremonia u zhvillua nga Motor Show në Gjenevë (për të 11 herë). Makina fituese u zgjodh nga një juri me 59 anëtarë, e përbërë nga gazetarë makinash, nga 22 vende. Ashtu siç ndodhi në edicionin e vitit të kaluar, votimi u zhvillua në transmetim të drejtpërdrejtë dhe u prezantua nga Frank Janssen, president i jurisë.
Makinat finaliste për Car of The Year 2022 u zgjodhën 7 nga modelet e reja në shitje në Europë vitin e kaluar.
Kurioziteti më i rëndësishëm i edicionit të këtij viti është se 6 nga 7 makina ishin elektrike, ndërsa vetëm njëra kishte motor termik që kombinohej me një formë elektrifikimit plug-in.
Më poshtë janë gjashtë modelet kryesore që konkurruan për çmimin e këtij viti sipas rendit alfabetik: ato ishin Cupra Born, Ford Mustang Mach-E, Hyundai Ioniq 5, Peugeot 308, Renault Megane E-Tech dhe Skoda Enjaq iV.
Në fund, duhet theksuar se anëtarët e jurisë janë zakonisht 61, por duke pasur parasysh luftën në Ukrainë, nuk janë numëruar votat e dy përfaqësuesve të Rusisë dhe flamuri është hequr.
Në votim merren gjithmonë parasysh kritere si dizajni, komoditeti, siguria, ekonomia, performanca, funksionaliteti, qëndrueshmëria mjedisore, kënaqësia e drejtimit dhe çmimi. Zgjedhja më e mirë për vitin 2022 ishte Kia EV6.
