I mjaftoi të prezantonte një sezon të vetëm “Pasdite në Top Channel” që shqiptarët të mos e harronin lehtë imazhin e saj. Por sigurisht që kontributi i saj i nisur shumë më herët me kronika të mira në këtë televizion, vazhdoi deri më tani përtej “Pasdites”. Flasim për simpatiken Lira Burgija e cila pas shumë vitesh si gazetare, ka braktisur kanalin e rëndësishëm, për të nisur një angazhim të ri në një institucion gjithashtu të rëndësishëm.
Ajo do të punojë në Shoqërinë Gjermane për Bashkëpunimin Ndërkombëtar GIZ. Kjo shoqëri e mbështetur dhe e financuar drejtëpërdrejtë nga qeveria gjermane, operon prej vitesh në Shqipëri duke zhvilluar aktivitete të shumta për mbështetjen dhe promovimin e turizmit sidomos rural në vendin tonë e jo vetëm.
Përmes aktiviteteve të GIZ shumë shqiptarë janë njohur me pika turistike të paprekura e të papromovuara më herët, duke kthyer vëmendjen e njerëzve në vende shumë të bukura por të harruara. Nuk dimë ende se cila do të jetë detyra e Lirës në këtë shoqëri, por me siguri që në aktivitetin e parë do të dëgjojmë shumë shpejt të flitet për të. Suksese!/ revistawho.com
