Italia, ashtu si disa vende të tjera të Europës, është duke u përballur me valën e tretë të Covid-19, pas rritjes së shifrave të viktimave dhe rasteve të reja. Nisur nga kjo autoritetet në vendin fqinj kanë vendosur që Italia të qëndroj pothuajse e mbyllur deri në muajin maj. Nga dita e hëna më shumë se gjysma e vendit do të jetë në zonën e kuqe, me Calabria-n, Toscana-n dhe Valle d’Aosta-n që do t’i shtohen 7 rajoneve dhe provincës autonome të Trentos, në të cilën janë në fuqi kufizimet më të forta, ndërsa një pjesë e Romës është përsëri me portokalli.
Me 24 mijë raste të reja dhe 450 vdekje në një ditë, qeveria konfirmon ashpërsinë maksimale edhe pas festës së Pashkëve. Gjithsesi në të gjithë zonën e kuqe do të vijojë mësimi deri në klasën e gjashtë, ndërsa në ato portokalli të gjithë nxënësit deri në klasën e tetë dhe 50% të nxënësve të shkollës së mesme do të jenë në klasë.
Deri më 30 Prill nuk do të ketë asnjë lëvizje midis rajoneve, qepena të ulur akoma për bare dhe restorante, ndërsa rihapja e palestrave, pishinave, kinemave dhe teatrove do të jetë në një datë të mëvonshme. Zona e verdhë e planifikuar u anulua deri në fund të muajit.
“Masat e miratuara deri më tani na kanë dhënë shenjën e parë të ngadalësimit, por situata është ende delikate”- tha Ministri i Shëndetësisë Roberto Speranza. Vendimi për të zgjatur shtrëngimin e masave u dha nga drejtuesit, por gjithsesi shkaktoi tension tek njerëzit
