Stilisti i famshëm japonez, Kenzo Takada ka vdekur nga koronavirusi, në moshën 81-vjeçare. Ai ndërroi jetë në spital, pasi iu rënduan simptomat e virusit.
Kenzo ishte stilisti i parë japonez që u zhvendos në Paris, ku zhvilloi gjithë karrierën e tij duke arritur famë ndërkombëtare. Ai lindi në prefekturën japoneze të Hyogo në vitin 1939 dhe ishte i pesti nga shtatë fëmijë. Pasi ndoqi shkollën e modës “Bunka Gakuen” në Tokio, në 1965-ën Kenzo u zhvendos në Paris ku ndoqi shfaqjet e modës Cardin, Dior, Channel dhe bashkëpunoi, ndër të tjera, me shtëpinë e modës Feraud dhe revistën “Jardin des modës”. Në vitin 1970 ai hapi “Jungle Jap”, dyqanin e tij të parë në Ville Lumiere, dhe krijoi markën, Kenzo.
Në krijimet e tij origjinale, format dhe modelet e huazuara nga tradita japoneze përzihen me stilin evropian dhe me kulturën e metropoleve si Nju-Jorku. Në veshjet e tij interpretohet fuqia e luleve, me printe të kapura në xhungël dhe referenca ndaj simbolikës së natyrës, duke revolucionarizuar shijen e viteve ‘70 dhe ‘80. Koleksioneve për gra dhe burra iu bashkua në 1977-ën edhe ai për fëmijë dhe në vitin 1988 edhe një linjë parfumesh.
Që nga viti 1980, marka Kenzo është kthyer në një kompani (e kryesuar nga F. Baufumé), e blerë në 1993-ën nga LVMH Arnault, i cili ishte drejtori krijues deri në 1999-ën, që nga viti 2000 u zëvendësua nga projektuesi skandinav R. Krejberg.
