“Në kurthin e Piter Pan”, programi më i dashur jo vetëm për fëmijët, por për të gjithë familjen, nis sonte një lundrim të ri në ekranin e Tv Klan. Një maratonë e vërtetë audicionesh, me vogëlushë të jashtëzakonshëm që konkurruan për t’u bërë pjesë e kastit, sonte do të zbulojë se cilët janë 10 gazetarët e vegjël që do të futin në kurth personazhet e njohur të ekranit. Ata që do të befasojnë të ftuarit dhe të gjithë publikun publikun çdo të hënë, në fakt e kanë nisur punën prej disa ditësh. Mbrëmjen e djeshme, në provat gjenerale të spektaklit kanë nisur me pyetjet e tyre pikante me dy personazhet e parë.
Cilët janë? Dy artistë të jashtëzakonshëm, të cilët kanë prekur skenat prestigjioze botërore, por sa herë është fjala për publikun shqiptar, kthehen e rikthehen gjithmonë me mall.
Tenori me famë ndërkombëtare Josif Gjipali është i ftuari i parë që do të përballet me gazetarët e vegjël. Gjipali nuk do të rrëfejë vetëm për sukseset e jashtëzakonshme në skenat më të mëdha në të gjithë botën, por do të bëjë edhe një retrospektivë nëpër kujtime, do të ndajë me ne të pathënat e sfidave dhe vështirësive që ka kaluar drejt ngjitjes në karrierë, mes emrave më të njohur të muzikës lirike në të gjithë botën.
I dyti që do të jetë përballë gazetarëve të vegjël është ikona e baletit shqiptar, Ilir Shaqiri, ndër më të përfolurit e muajve të fundit pas pjesëmarrjes dhe fitores së reality show-t “Big Brother VIP”. Edhe ai ka mjaft për të rrëfyer për të gjitha sfidat që i është dashur të kapërcejë për të shkëlqyer në çdo skenë ku ka kërcyer. Po vjen për herë të parë në një rrëfim ndryshe, përballë kuriozitetit dhe pyetjeve pikante të fëmijëve.
Anija e “Piter Panit” ka nisur lundrimin, me në krye producenten dhe regjisoren Vera Grabocka, dhe prezantimin e Alketa Vejsiut.