Një rrjet ndërkombëtar kriminal përgjegjës për shpërndarjen e paligjshme të filmave dhe spektakle televizive në të gjithë botën është shpërbërë nga një aksion i përbashkët midis autoriteteve amerikane dhe homologëve të tyre në 18 vende.
Mbi 60 servera kaluan “offlin” në Amerikën e Veriut, Evropë dhe Azi. Disa nga të dyshuarit kryesorë u arrestuan.
Ata pretendohet se i kanë shkaktuar dhjetëra miliona dollarë humbje industrisë së filmave, televizioneve dhe industrisë mbështetëse të tyre.
“Ky rast është një shembull i shkëlqyeshëm i asaj që mund të arrihet nëse punojmë së bashku përtej kufijve dhe kontinenteve. Falë partneritetit të gjatë midis SH.B.A. dhe autoriteteve evropiane, ne arritëm të bënim një goditje të konsiderueshme në piraterinë në internet. Urimet e mia të sinqerta u drejtohen të gjitha vendeve të përfshira në aksion”, tha Ladislav Hamran, Presidenti i Eurojust, organizata e Bashkimit Evropian që merret me bashkëpunimin gjyqësor.
Grupet Sparks mashtruan shpërndarësit ligjorë që t’i lejonin të merrnin kopje ligjore të disqeve DVD dhe Blu-Ray të filmave, spektakleve televizive dhe përmbajtje të tjera përpara datave të lëshimit të tyre. Më pas materialet shpërndaheshin përmes faqeve të internetit streaming, rrjeteve peer-to-peer si edhe rrjeteve torrent.
Serverët ishin të vendosur në disa vende të botës, duke përfshirë Republikën e Koresë, Republikën Çeke, Danimarkën, Francën, Gjermaninë, Letoninë, Rumaninë, Poloninë, Portugalinë, Spanjën, Suedinë, Zvicrën, Hollandën, Norvegjinë dhe Mbretërinë e Bashkuar.
Një prej anëtarëve të rrjetit të dyshuar kriminal u arrestua gjatë fundjavës në Qipro dhe një tjetër i dyshuar u arrestua dje në Shtetet e Bashkuara./IMA/
