Operatorët televiziv lokal rrezikojnë të mbyllin transmetimet, tarifa e vendosur nga RTSH për ngritjen e infrastukturës dixhitale dhe mirëmbajtja e transmetimeve është e papërballueshme për shumë prej tyre.
Ditën e djeshme AMA ka zhvilluar një takim konsultativ me operatorët analogë privatë vendorë për diskutimin e tarifës së mbështetjes në rrjetin numerik të RTSH-së.
Proçesi i dixhitalizimit të transmetimeve televizive vazhdon të përcillet me probleme dhe pakënaqësi nga subjektet private televizive, këtë herë të shqetsuar janë operatorët analog lokal të cilët në takimin e drejtuar nga Kryetari i AMA-s, Z. Gentian Sala, me të pranishëm Zëvendëskryetarin Z. Sami Nezaj, Drejtorin e Kabinetit Z. Dritan Xhelili si dhe Drejtori Teknik të Radio Televizionit Shqiptar Z. Ermir Agaçi kanë reaguar kundër tarifës që këtyre operatorëve do t’i duhet të paguajnë për mbështetjen e programeve të tyre në rrjetin numerik të televizionit publik.
Tarifa e propozuar nga RTSH konsideron vetëm zërat financiar që lidhen me mirëmbajtjen e rrjetit numerik duke mos përfshirë kostot e ndërtimit të rrjetit. Kosto e kësaj tarife llogaritet nga RTSH 1073 për një qark të vetëm të shtrirjes së sinjalit. Ndërsa për rajonin Tiranë-Durrës operatorët do të duhet të paguajnë dyfishin e kësaj shume.
Përfaqësuesit e operatorëve vendorë të pranishëm në këtë takim kanë kërkuar nga AMA për të negociuar me RTSH mbi vlerën e tarifës, detyrim i cili nëse do të aplikohej do të rrezikonte mbylljen e transmetimeve të shumë operatorëve të vegjël. Ata propozuan gjithashtu edhe një periudhë dy vjeçare subvencioni nga ana e shtetit për këtë tarifë, mbështetje ekonomike të cilën Z. Sala nuk e ka mohuar por që i takon qeverisë të vendos për afatin, e cila ka në programin e saj një realizim të tillë.
Përfaqësuesi i RTSH, Z. Agaçi theksoi se RTSH-ja do të dalë me transmetimet numerike on air duke filluar nga muaji prill në allotmentin e Tiranës. Ai gjithashtu, deklaroi se RTSH është garanti për cilësinë dhe ecurinë e transmetimeve DVB-T2 të cilat sigurohen nga rrjeti tërësisht i ri.
Në muajët në vazhdim AMA, pasi do të shqyrtojë propozimet e operatorëve vendorë dhe vlerësojë kostot financiare të paraqitura nga RTSH, do të jetë e gatshme të shprehet për ecurinë e këtij proçesi.
