Seriali i shumëpritur i Netflix, “Griselda”, i cili trajton jetën e kumbares së famshme të kokainës Griselda Blanco, është përfshirë në një konflikt ligjor para se të nisë transmetimi i tij. Familjarët e Blanco-s, që ka qenë një figurë dominuese në tregun e narkotikëve në Miami, Florida, kanë paditur autorët e serialit dhe aktoren kryesore, Sofia Vergara, duke kërkuar ndalimin e publikimit të shfaqjes televizive.
Anëtarët e familjes, përfshirë djalin e Griselda-s, Michael Corleone, pretendojnë se Netflix nuk ka marrë autorizimin dhe pëlqimin e tyre për përdorimin e historisë, fotografive, videove, apo materialeve të tjera që do të paraqiten në serial. Sipas padisë, që nga viti 2009, Michael Corleone ka dhënë intervista për individë të interesuar të shkruajnë libra apo të realizojnë filma mbi jetën e nënës së tij. Ai thekson se Netflix shprehu interes fillimisht për projektin, por më pas vendosi të mos përdorte detajet nga këto intervista, duke i lënë të bazohet në thashetheme dhe zëra për jetën e Griselda-s.
Familja Corleone argumenton se platforma e streaming-ut ka përvetësuar pa të drejtë historinë e tyre dhe e ka përfshirë në serial pa respektuar të drejtat e tyre. Deri më tani, nuk ka pasur ndonjë reagim zyrtar nga ana e producentëve të serialit apo nga Sofia Vergara, e cila është gjithashtu e përfshirë në padinë.
Seriali “Griselda” është caktuar të shfaqet në Netflix nga 25 janari, pavarësisht kësaj beteje ligjore që po zhvillohet. Ky rast ka tërhequr vëmendjen e publikut dhe fansave të serialit, të cilët janë kuriozë të shohin se si do të menaxhohet kjo situatë dhe nëse do të ndikojë në publikimin e shfaqjes televizive.
