Televizioni Kombëtar Klan do të vijë shumë shpejt në Shqipëri dhe në mbarë botën nëpërmjet teknologjisë më të fundit të transmetimeve, platformës OTT.
Kjo platformë është një shërbim mediatik që u ofrohet shikuesve kudo që janë nëpërmjet internetit, duke përdorur pajisjet tuaja telefon, tablet, laptop apo kompjuter.
Nëpërmjet këtij shërbimi shikuesit mund të shikojnë programet e preferuara kur të dëshirojnë, falë opsioneve VOD dhe Catch up tv. Një program direkt apo një serial që shihet në platformën OTT mund të ndalohet dhe të riniset aty ku ishte ndalur. Përmes OTT mund të vihen në regjistrim kanale, programet e të cilave mund të shihen në çdo kohë.
Me këtë platformë, programet e Tv Klan do të shfaqen tashmë jo vetëm në televizore, por në çdo ekran tjetër të pajisjeve të ndryshme si telefonat smart me sistem Android apo iOS, tablet, laptop apo kompjuter, që tashme janë në përdorim nga çdo moshë e kategori, por në mënyrë të veçantë nga të rinjtë.
OTT ofron një videotekë virtuale me një pafundësi filmash, dokumentarësh, filma vizatimorë për fëmijë, seriale, etj, të cilët mund të shikohen kudo dhe kurdo. Falë fleksibilitetit që ofron ndërveprimi në OTT mund të shtyhen përpara me shpejtësi, apo të kthehen mbrapa, të ndalohen e të rifillohet edhe nëse ka kaluar një muaj nga koha kur është ndaluar së pari.
Sinjali televiziv përmes platformës OTT ofrohet me një cilësi tepër të lartë nëpërmjet internetit.
Përmes kësaj teknologjie të së ardhmes, që ofrohet në formën më të thjeshtë për çdo përdorues, televizioni Klan dhe të gjitha kanalet e platformës, do t’u mundësojë shikuesve në Shqipëri dhe mbarë botën të shohin të gjitha programet më të ndjekurat në vend.
