Televizionit tradicional tashmë i ka kaluar koha dhe dita ditës me zhvillimin e teknologjisë publiku po orientohet më së shumti drejt përmbajtjeve online, të aksesueshme kudo nga çdo aparat multimedial. Kështu drejt kësaj përqasje televizioni shtetëror britanik BBC ka nisur produksionin e komedive, dokumentarëve, serialeve të zhanërve të ndryshëm, me personazhe të njohur dhe të rinj. Të gjitha këto produksione do të mund të ndiqen vetëm online në iPlayer, shërbimin video streaming të BBC, deri tani i menduar për të ofruar programet e transmetuara në kanalet e rrjetit tradicional.
Të shumta do të jenë programet që fillimisht do të shpërndahen ekskluzivisht në web. Nga humori anglez tek zhanri horror, nga seriali për Shën Valentinin tek ai për kulturën myslimane, e ndërsa nuk do të mungojnë edhe formatet e reja për të kënaqur një shumëllojshmëri publiku.
Victoria Jaye, përfaqësuese e BBC iPlayer, ka deklaruar se kërkesa për përmbajtje origjinale dhe ekskluzive në web është trefishuar vitin e fundit dhe ka një rënie në vizitorë të iPlayer që shikojnë programet e BBC. Website-i ka nevojë të rikonceptohet për të tërhequr sërisht vizitorët drejt tij me shërbime të reja.
