Partia Socialiste ka konkretizuar nismën për të shkarkuar presidentin Ilir Meta. Mësohet se janë mbledhur 36 firma nga deputetët socialistë nga 35 që duhen gjithësej për të propozuar zyrtarisht nismën e për ta dorëzuar në Kuvend.
Ndërkaq, sot paradite u mbajt mbledhja e Konferencës së Kryetarëve të Parlamentit ku u miratua kalendari tre mujor dhe tre javor, ndërsa mësohet se Kuvendi do të mblidhet në datat 4,6,13 dhe 20 maj, me deputetët aktualë dhe jo ato të zgjedhur në zgjedhjet e 25 prillit.
Ditën e premte, pas konferencës për shtyp të presidentit Meta i cili tha se do të qëndrojë në detyrë deri në 24 Korrik 2022 dhe se paralajmërimet për shkarkim janë shashka, në telefonat e deputetëve aktualë u dërgua një mesazh nga Taulant Balla i cili kërkoi që deputetët të paraqiten në Zyrën e Grupit Parlamentar për të firmosur propozimin për shkarkimin e presidentit.
Nisma për shkarkimin e Presidentit Meta nisi pas fitores së Partisë Socialiste në zgjedhjet e 25 prillit, por nuk është hera e parë.
