Më 2 shkurt, filmave shumë të pëlqyer shqiptarë ‘Zonjusha’ dhe ‘Diamanti’ tashmë do t’u shtohet edhe pjesa e tretë ‘Adnan Kafazi’.
“Adnan Kafazi” ka publikuar sot trailerin e tyre zyrtar, për të shfaqur më shumë nga ajo se çfarë do të shohim në të vërtetë në premierën e filmit.
“Adnan Kafazi” do të fokusohet në kthimin e tre karaktereve kryesore të filmave, Vuçës, Bullit e Zagit nga Meksika dhe lufta e tyre me një bos të ri të krimit, i cili e ka marrë funksionin e nëntokës dhe krimit në vendin e tyre.
Theks të veçantë do të ketë edhe trafikimi i qenieve njerëzore dhe fuqizimi i gjinisë femërore.
Për dallim nga dy pjesët e para të triologjisë (Zonjusha, Diamanti) të cilët si zhanër kryesor kanë patur komedinë dhe krimin, “Adnan Kafazi’ është plotësuar si multizhanër me krim, komedi, dramë, muzikë e aksion.
Ky film përfshinë shumicën e aktorëve të mbijetuar nga filmat e kaluar si Armend Baloku, Besart Sllamniku, Muhamed Arifi, Ylber Bardhi, Dukagjin Podrimaj, Edona Reshitaj, Lulzim Bucolli.
Me zhvillimin e ngjarjes së filmit të ri, janë bashkangjitur edhe shumë aktorë tjerë të mirënjohur kosovar, të cilët do të pasurojnë rrugëtimin e ri të personazhëve kryesor, siç janë: Armond Morina, Arta Mucaj, Shkumbin Istrefi, Fatmir Spahiu Bufi, Xhejlane Tërbunja, Ernest Malazogu, Edita Sllamniku, Blin Sylejmani, Arjanit Mërmullaku, Petrit Pjetër Bylykbashi etj.
Kësaj here, trupës i bashkangjiten edhe dy aktore nga Shqipëria, Alessia Xhemalaj dhe Olimpia Smajlaj.
Po ashtu, në cilësinë e mysafirëve special, filmin e pasuruan edhe Dafina Zeqiri dhe Kastriot Rexha – MAJK.
Më poshtë mund të shihni edhe trailerin zyrtar.
