Kryeministri Edi Rama ka zgjedhur që të anashkalojë dhe të mos japë përgjigje të drejtpërdrejtë në lidhje me vendimin e kryedemokratit, Lulzim Basha për të përjashtuar Sali Berishën nga grupi parlamentar i PD-së.
Gazetarët e kanë pyetur disa herë kryeministrin në lidhje me këtë, por përgjigja e vetme që dha ishte se dora e tij është e shtrirë qoftë edhe ndaj PD-së për zhvillimin e vendit.
“Ndalova për t’ju uruar të gjithëve një punë të mbarë si shërbëtorë të publikut, unë do të angazhohem personalisht dhe PS do të bëjë të gjithë përpjekjen që të kemi sa më shumë energji të shpenzuara për njerëzit dhe për sfidat reale dhe sa më pak energji për atë që politika ka bërë fatkeqësisht në shumë vite, duke u bërë një pronë e politikanëve që e kanë abuzuar vijimësisht për qëllime, interesa dhe ambicie që mund të jenë të natyrshme por që nuk janë të mjaftueshme për tu ngritur mbi interesat.
PS e ka marrë një mandat të treta për ta çuar vendin në një nivel tjetër, dhe sot është në një moment të rëndësishëm të rrugëtimit të saj pasi duhet të ndjejë përgjegjësinë për çuarjen e Shqipërisë në një nivel të rëndësishëm, tjerat janë më të panevojshme.
Ne vijmë në këtë kuvend për mandatin e tretë me dorën e shtrirë, pa marrë parasysh sesi do të shkonin zhvillimet në PD dora është e shtrirë për të bashkëpunuar në funksion të shtetit. PS e ka të vështirë që të shikojë nga lart poshtë, ne jemi lart dhe do të shikojmë përpara dhe kush do që të bashkohet me ne është i mirëpritur”, ka thënë ai.
I pyetur nëse ka një marrëveshje me Bashën, ashtu siç tha Berisha, Rama nuk dha një përgjigje, por i dha fjalën gazetarëve se nuk do t’i sulmojë më si më parë.
