Romeo Veshaj, një nga banorët më të përfolur të “Big Brother VIP”, ka ndarë me bashkëbanorët një rrëfim prekës për fillimet e tij të vështira në Tiranë. Duke ardhur nga Vlora në kërkim të një jete më të mirë, Romeo tregoi se si iu desh të luftonte për të mbijetuar, duke jetuar në korridorin e një dhome me qira për pothuajse një vit.
Në moshën vetëm 16-vjeçare, pa mbështetjen e vëllait të tij, Donaldin, në atë kohë, Romeo u përball me sfida të mëdha. Ai rrëfeu për periudhën kur mezi mbante veten me 20 mijë lekë në xhep për gjithë javën dhe ishte i detyruar të përdorte truke për të qëndruar në hotele të lira.
“Tek zona e Selvisë këtu në Tiranë, ishin disa hotele 10 mijë lekë nata. Dhe unë bëja të njejtën skemë me çdo hotel. Jepja kartën e identitetit ditën e hënë dhe i thoja që lekët do t’i paguaj në fund të javës. Kur vinte fundi i javës unë hidhesha nga dritarja dhe me 10 mijë lekë të tjera nxirrja një kartë tjetër identiteti dhe vazhdoja tek një hotel tjetër,” tregoi Romeo.
Përpjekjet e tij për të mbijetuar dhe për të siguruar të ardhura të mjaftueshme për të dalë nga kjo situatë e vështirë, më në fund u shpërblyen. Ai dhe Donaldi arritën të gjejnë dhe të marrin me qira shtëpinë e tyre të parë në Tiranë, e cila përmbante vetëm një korridor me dy krevate portativë.
