Moderatorja e sportit, Hygerta Sako, ka folur në një interviste për ‘albeu.com’ rreth planeve për të ardhmen e saj si dhe pasionin për udhëtimet.
Prej vitesh ajo është beqare dhe e konfirmoi se nuk ka dëshirë ende të krijojë një jetë të re, dhe se prioriteti i saj është vajza e cila pak ditë më parë festoi 15 vjetorin.
Më tej e pyetur rreth konkurrencës brenda punës së saj ajo u shpreh se jemi koleg dhe miq dhe se punën e bëjmë me dashuri.
Tani u bë vite si moderatore sportive, për çfarë do ta linte sportin Gerta?
-Më pëlqen aq shumë puna ime sa më dëshirë s’do e braktisja kurrë. Por jetës nuk i dihet dhe kurrë mos thuaj kurrë. Nëse do ta lija, do ishte veç një arsye madhore që s’mund ta parashikoj. Për momentin është mendimi i fundit që më vjen ndër mend. E dua futbollin dhe e bëj më shumë dëshirë punën time.
A i trembeni konkurrencës brenda stafit te RTSH Sport?
-S’ka konkurrencë në stafin tonë. Jemi një ekip, një grup profesionistësh që punojmë më shumë dashuri e pasion. Mbështesim njeri-tjetrin maksimalisht dhe përveçse kolegë jemi dhe miq. Nuk i jam trembur asnjëherë konkurrencës, ajo të vë në pozita pune e të motivon. Nëse puna funksionon me meritokraci, s’kam pse të kem frikë nga asgjë.
Si ka arritur Gerta të mbajë trupin kaq në formë?
-Është edhe gjenetike, nuk është totalisht meritë e imja. Me kalimin e moshës u bëra pak me e ndërgjegjshme që po nuk u kujdese nuk ka gjenetike që të shpëton. Ndaj jam shumë e vëmendshme të ha vakte të shëndetshme, të ushtroj sport dhe të mos abuzoj me oraret. S’ka asgjë të pamundur nëse ke vullnet dhe dëshire për ta arritur.
Përveç sportit qe ju zë një pjesë të ditës, më se e kaloni kohën e lirë? (Pasion tjetër d.m.th)
-Pasion tjetër shumë i madh i imi janë udhëtimet. Më pëlqen shumë të udhëtoj, të eksploroj vende të reja, të vizitoj qendra historike apo bukuri natyrore. Ndaj sa herë më jepet mundësia, lëviz nga Tirana.
Cili është synimi i madh i në të ardhmen e afërt?
-Të krijoj muskujt abdominale Bëj shaka. Synimi për të ardhmen e afërt është të finalizoj me sukses edicionin e tretë të “Më të mirët e vitit”, tashmë është një traditë që këtë vit dëshiroj t’i jap përmasa akoma më të mëdha duke qenë se jam producente e këtij evenimenti. Shpresoj që edhe këtë vit me RTSH Sport të realizojmë një edicion të suksesshëm dhe dinjitoz.
Turizmi malor apo detar?
-Anoj shumë më shumë nga deti. Duke qenë se jam rritur pranë detit, babi nga Vlora, mami nga Saranda, pra dhe pushimet te gjyshërit ishin përsëri pranë detit, jam shumë e dhënë pas turizmit detar. Por dhe mali më pëlqen, mjafton mos të ngjitem në 2000 m lartësi me këmbe
Cili është qyteti juaj i preferuar që ju merr malli sa herë e vizitoni?
-Vlora, qyteti i origjinës time dhe pas saj Shkodra. Janë dy qytete që i dua shumë dhe shkoj sa më shpesh të mundem. Me Vlorën me lidhin shumë edhe kujtimet e fëmijërisë, përveç natyrës së mrekullueshme që ka. Kurse Shkodra për mua është qytet i veçantë, e dua shumë dhe e vizitoj shpesh.
Siç e dinë tashmë të gjithë ju jeni ende beqare. A ka ardhur koha që Gerta të krijoje një jetë të re?
-Mua më pëlqen jeta që bëj. Këto gjëra nuk janë me llogari. Prioriteti im është vajza, kujdesi dhe përkushtimi për të. Por nëse dikush do jetë aq special sa të më bëjë për vete, le të vijë. Deri tani askush nuk më ka tunduar aq shumë. Dhe unë gjithmonë them: më mire vetëm se sa e keqshoqëruar.
