Rritja e konkurrencës rëndon në Netflix.
Edhe pse tremujori i katërt mbyllet mbi pritshmëritë e analistëve, gjigandi i transmetimit televiziv zhytet në Wall Street, duke humbur mbi 10%.
Stoqet penalizohen nga vlerësimet për 3 mujorin e parë të vitit, të cilat janë më të ulëta se parashikimet e tregut për abonimet, fitimet dhe të ardhurat.
“Konsumatorët kanë pasur gjithmonë shumë zgjedhje në frontin e argëtimit. Gjatë 24 muajve të fundit, konkurrenca është intensifikuar me kompanitë që zhvillojnë platformat e tyre të streaming. Ndërsa konkurrenca mund të ketë një ndikim, ne kemi vazhduar të rritemi në të gjitha vendet dhe rajonet ku këto platforma të reja janë lançuar”, thotë Netflix. Falë serialit ‘Cobra Kai‘ dhe filmit ‘Don’t Look Up‘ me Leonardo di Caprio dhe Jennifer Lawrence, gjigandi i transmetimit televiziv mbylli tremujorin e katërt me të ardhura që shkojnë deri në 7.71 miliardë dollarë dhe fitime për aksion deri në $ 1,33 nga 1,19 dollarë për të njëjtën periudhë të vitit të kaluar.
Abonentët u rritën me 8.5 milionë, për të mbyllur vitin 2021 në 221.8 milionë. Për tremujorin e vitit Netflix vlerëson vetëm 2.5 milionë abonentë të rinj, padyshim nën pritshmëritë e analistëve. Rritja e abonimeve është ngadalësuar që nga fillimi i pandemisë në vitin 2020, kur bllokimet detyruan miliarda njerëz në shtëpi.
Rihapja e ekonomisë dhe konkurrenca në rritje kanë kontribuar në ngadalësimin, i cili tani ka filluar të shqetësojë investitorët.
