Këtë Vit të Ri do ta çojmë telekomandën këtej nga RTSH-ja. Një foto e aktores Egla Ceno, në të cilën ishte kokë më kokë me Vis Pupën, Romir Zallën, Vikena Kamenicën dhe Alex, na kuriozoi se ç`po ndodhte. Vetëm “soon rtsh” thuhej. Ne të tiranapost.al kontaktuam Vis Pupën i cili na sqaroi duke na dhënë dy lajme të mira: “Ishin në prova se kemi disa materiale për programin e Vitit të Ri në tvsh. Show i ri e fillon punën nga janari. Faleminderit.”
Nuk e lamë me kaq. Kontaktuam edhe me Romir Zallën, i cili na zbuloi ca më tepër. “Për të qenë korrekt: bëhet fjalë për ‘Ti je festa ime 2018’ që e moderoj me Vikenën dhe Visin. Egla, Aleksi, Albana Kocaj dhe Marjana Kondi janë pjesa tjetër e grupit. Vjet ‘Ti je festa ime 2017’ e kam moderuar bashkë me Ervina Kotolloshin dhe bashkëpunuam me Erand Sojlin.”, tha Romiri.
Kujtojmë që programi i fundvitit në RTSH, ka qenë një nga më të ndjekurit dikur, ndërkohë që janë të paktë ata që e kanë akoma RTSH-në në listën e kanaleve. Jo se televizionet e tjera po bëjnë namin për fundvit, por ky i RTSH-së ka mbetur si nostalgji. Në familjet shqiptare është parë gjithmonë me shumë kënaqësi. Çdo vit thuhet që nga RTSH-ja do jetë program i mirë, por nuk kemi parë ndonjë hata. Meqë këta aktorët shquhen për gjëra të lezetshme, mbase do ta shikojmë më gjatë RTSH-në këtë vit.
E kuptuam. Pasi të kemi shijuar spektaklin e fundvitit përvishen mëngët për programin e ri të Visit, që mbetet për t`u parë se ku do të shfaqet. Le të presim festat njëherë.
Fabjola Hije/Tiranapost.al