Federata Shqiptare e Futbollit (FSHF) ka njoftuar arritjen e një marrëveshjeje me Radio Televizionin Shqiptar (RTSH) për transmetimin ekskluziv të kampionateve kombëtare të futbollit për tre sezonet e ardhshme. Marrëveshja përfshin Kategorinë Superiore, Final 4, Kategorinë e Parë, Kupën e Shqipërisë dhe Superkupën e Shqipërisë.
Pas një procesi të hapur për shitjen e të drejtave televizive, Komiteti Ekzekutiv i FSHF-së shqyrtoi ofertat e operatorëve kombëtarë dhe vendosi të shpallë fituese ofertën e RTSH-së. Sipas kësaj marrëveshjeje, RTSH do të ketë të drejtën ekskluzive për transmetimin e kompeticioneve kombëtare në Shqipëri dhe Kosovë për sezonet 2024/25, 2025/26 dhe 2026/27.
Kampionati i Kategorisë Superiore, që do të jetë nën ombrellën e RTSH-së, do të nisë edicionin e tij të 86-të më 18 gusht, ndërsa Kategoria e Parë do të fillojë më 24 gusht. Kjo marrëveshje pritet të sjellë më afër tifozëve shqiptarë emocionet dhe spektaklin e futbollit kombëtar për tre vitet e ardhshme.
