Gjyqtarja Emi Koni Baret është konfirmuar si anëtarja më e re e përjetshme e Gjykatës së Lartë amerikane.
48-vjeçarja e kandiduar nga presidenti Donald Trump, mori të hënën përkrahjen e 52 senatorëve dhe 48 vota kundër, mes kundërshtarëve edhe një senatore e Partisë Republikane në pushtet.
Tashmë institucioni më suprem i drejtësisë amerikane numërohen 6 anëtarë me bindje konservatore, ndërsa një pakicë prej 3 anëtarësh mbron pikëpamjet liberale të opozitës aktuale.
“Betimi solemn që mbaj sot do të jetë në thelb të detyrës që do e kryej pa frikë e pa anësi, pavarësisht vijave politike dhe preferencave të mia,” u shpreh gjyqtarja Baret.
Juristja, akademikja dhe nëna e 7 fëmijëve do të pasojë ikonën e liberalizmit në drejtësi, gjyqtaren Ruth Bejdër Ginsbërg, e cila ndërroi jetë në muajin shtator në moshën 87-vjeçare.
“Kjo është ditë historike për Amerikën, për Kushtetutën e SHBA-së dhe për sundimin e drejtë dhe të paanshëm të ligjit. Gjyqtarja Baret ka cilësitë e duhura për të zënë vendin e pioneres së vërtetë për gratë, të gjyqtares Ruth Bejdër Ginsbërg,” shtoi Trump.
48-vjeçarja Baret u zgjodh mes debatesh të shumta në Senat ndërsa për ditë me radhë kaloi testin e seancave dëgjimore ku shpalosi një vizion konservator për Kushtetutën amerikane.
Opozita druhet se tani që pala tjetër ka shumicën e Gjykatës, rrezikohet të shfuqizohen një sërë kauzash sociale, si e drejta e abortit, ligji për sigurimin shëndetësor apo për emigracionin.
Demokrati Xho Bajden i cili shpreson të fitojë presidencën në zgjedhjet e 3 nëntorit, ka thënë se mund të sjellë drejtpeshimin në Gjykatën e Lartë duke shtuar anëtarë të rinj me bindje liberale.