Mesa duket, TV Klan ka bërë mirë që pranoi në shtëpinë e tij, dyshen Saimir Kodra dhe
Gent Zenelaj, pas mbylljes së televizionit “Agon” dhe rrjedhimisht show-t të tyre
investigativ “Ça thu?”.
Të dhënat nga matësi i audiencës televizive, “Telemetrix” tregojnë se programi, tashmë nën emrin e ri “Stop” ka kapur një audiencë më të lartë se “babai” i këtij lloj formati në Shqipëri, “Fiks Fare” që transmetohet në Top Channel.
Nëse shihni grafikët e Telemetrix (shfleto galerinë) nga data 6 Janar deri në 12 Janar
(përjashtohen e shtuna dhe e diela kur këto emisione nuk transmetohen), “Stop” ka
shikueshmëri më të lartë përgjatë gjithë orarit të transmetimit.
Emisioni, ka nisur ditën e Hënë në 4 Janar, por mesa duket, pasi faza e parë e kuriozitetit u
shua, njerëzit vazhdojnë ta ndjekin.
Pa hequr meritat e Top Channel si nismëtari i kësaj formule fantastike që godet problematikën shqiptare (frymëzuar nga programi simotër “Striscia la Notizia” në Itali), tashmë rezultatet e para të shikueshmërisë, tregojnë se “Stop” duhet marrë seriozisht nga konkurrenti i vjetër, për më tepër që mbrapa këtij emisioni, është TV Klan, një emër po aq i fuqishëm sa i Top Channel-it dhe momentalisht (siç dëshmojnë dhe grafikët), kryesues në sondazhet e segmentit prime time.
Mund të jetë që të dy moderatorët tashmë janë “të testuar” në treg dhe kanë audiencën e
tyre prej vitesh. Saimir Kodra ishte bashkë-moderatori kryesor I “Fiks Fare” në Top Channel
për më shumë se 10 vjet së bashku me Gent Pjetrin (Doktorin) dhe një element i
rëndësishëm i programit. Nga ana tjetër aktori Gent Zenelaj, e nisi suksesshëm karrierën e
tij televizive si pjesë e grupit “The Shblsh” në Portokalli dhe vijoi po aq suksesshëm edhe
në “Apartamenti 2XL” Fakti që të dy e nisën këtë program në “Agon” prej më shumë se 1
viti, u ka dhënë mundësi që të krijojnë kiminë e duhur dhe të jenë të qartë me rolet e tyre
karshi publikut. Dhe kjo marrëdhënie përbën një garë të fortë mes dyshes tjetër kryesore
“Fiori Dardha & Doktori”, të cilët tashmë u duhet të luftojnë shumë edhe në batutë, për aq
kohë sa Saimiri dhe Genti kanë rezultuar shumë të suksesshëm në këtë aspekt.
Pse Stop po korr kaq shumë sukses që në fillimet e tij?
MATERIALE INVESTIGATIVE QË “BËJNË ZHURMË”
Një fakt tjetër i rëndësishëm është edhe materiali. Herë pas here gjatë kësaj gare të gjatë
do të ketë ulje dhe zbritje në shikueshmëri, në varësi të ekskluzivitetit të materialeve
investigative dhe përmbajtjes së tyre. “Stop” menjëherë “bëri zhurmë” me kamerën e
fshehtë ndaj Shefit të Specialistëve në Qendrën Kombëtare të Liçencimit që i kërkonte 3
mijë euro një qytetari për një biznes zgare. Disa ditë më pas, sërish një material ku
tregohej një mësuese që dhunonte një nxënëx, u përhap në rrjete sociale. Kjo mesa duket i
shtyu njerëizit të jenë më të vëmendshëm ndaj “Stop”, për të pritur materiale të tjera
interesante.
MENTALITETI SE TV KLAN ËSHTË OPOZITË
Televizioni “Klan” pavarësisht akuzave të fundit, është konsideruar gjithmonë “i djathtë”
në sy të publikut. Momentalisht, në qeverisjen socialiste, “Klan” për mentalitetin e
përgjithshëm, është më opozitar sesa Top Channel, edhe pse shumë argumentojnë që
aktualisht nuk ka ndonjë ndryshim thelbësor midis mënyrës se si këto dy televizione të
fuqishme kombëtare e mbulojnë politikën. Por ajo që fiksohet, fiksohet dhe një pjesë e
njerëzve mund të jenë të prirur të besojnë më shumë materialet e servirura nga “Stop” në
raport me “Fiks Fare”, duke menduar se redaksia e këtij programi në “Klan” është më e
ashpër dhe më pak seleksionuese në zbardhjen e shkeljeve nga qeveria apo përfaqësues
të administratës.
NDRYSHIM AMBIENTI
Ekspertët e televizionit gjithmonë të thonë se publiku shqiptar nuk është shumë besnik.
Emisionet më jetëgjata të suksesshme janë ato emisione që ndryshojnë shpesh strukturën
apo protagonistët brenda orarit të tyre. “E diela Shqiptare”, “Zonë e Lirë”, “Opinion”, “Top
Show” “Portokalli” janë emisione të cilat pasurohen çdo sezon nga rubrika të reja, aktorë
të rinj apo të ftuar surprizë që “lëshojnë bomba” gjatë transmetimit. Në përgjithësi, publiku
shqiptar kërkon ndryshim dhe pronari i ndjerë i Top Channel, ishte I pari që e kuptoi këtë,
duke ndryshuar vazhdimisht jo vetëm përmbajtjen, por edhe skenografitë deri tek siglat.
Ardhja e një emisioni që garanton shikueshmëri (Testuar nga “Fiks Fare) në një televizion
kombëtar me shumë audiencë, me skenografi të re, me velina të reja dhe me një strukturë
jo 100% të njëjtë me “Fiks Fare” mund të jetë një “rifreskim” për shikuesit të cilët në një
farë mënyre “ja kanë pirë lëngun” formatit “Fiks Fare”.
Marre nga Anabel
