The Voice of Albania 5|Nata e tretë – Përmbledhja e zgjedhjeve të trajnerëve

Ndonëse është 19 vjeç, ajo ka shumë projekte nëpër duar.  Ka marrë pjesë në çdo festival fëmijësh e talent-show muzikore, që nga 2004 deri në 2010. Madje ka fituar bursë talenti për studimet e larta. Një shtysë për këtë karrierë të pasur duket se është edhe babai i saj, i cili është instrumentist ndërsa vëllai i Evanthisë është inxhinier audio dhe e ndihmon, pasi ia njeh shumë mirë vokalin. Përveç muzikës, Evanthia ka pasion dhe photoshooting. Ndërkaq është duke punuar dhe si stiliste e po përgatit koleksionin e saj personal të veshjeve. Ajo shprehet se ‘The Voice’ e konsideron si sfidën më të madhe.

Julia ka vite që këndon dhe është kthyer në menaxhere të vetvetes. Bashkë me mamanë e saj, gjithashtu këngëtare, angazhohen nëpër koncerte jashtë Shqipërisë, ku e ëma këndon muzikë popullore, ndërsa Julia këngë të muzikës së lehtë. Ka aplikuar shumë vite më parë dhe në ‘The Voice 1’, por mosha e vogël e ka penalizuar. Julia Vjen në ‘The Voice’ me objektiva mjaft të qarta. E para, që të marrë realisht një gjykim profesional dhe së dyti, për të bërë një reklamë akoma më të mirë për veten, në ndihmë të aktivitetit të saj si këngëtare.

Bota e spektaklit dhe e talent show-t është një nga ëndrrat më të mëdha të Frosinës. Ajo, ndonëse studion për kanto, ende nuk ka mundur të çajë në rrugën e muzikës së lehtë. Deri më tani, zëri i saj është dëgjuar vetëm në ambientet e shtëpisë. Ajo dëshiron që të dalë përtej mureve të shtëpisë së saj, në mënyrë që edhe publiku të japë një vlerësim të tijin për zërin e saj. Kjo është edhe një nga arsyet kryesore se përse ajo vjen në ‘The Voice’. Ajo dëshiron të jetojë emocionet e një skene të madhe. Jeta e saj është shumë e lidhur me muzikën dhe asgjë tjetër nuk e motivon më shumë sesa muzika. Ajo shpreson shumë, që një nga trajnerët të impresionohet nga zëri i saj dhe të shtypë butonin. Kjo, sipas saj,  do të hapte një kapitull të ri në jetën e saj.

Për Elenin është prova e dytë në ‘The Voice’. Vitin e kaluar ajo nuk mundi të kalojë fazën e audicioneve. Këtë periudhë kohe është përpjekur ta shfrytëzojë për të provuar zërin e saj, në mënyrë që të jetë pjesë e ‘The Voice’, e të mos të dështojë si vitin e kaluar. Pasionin për aktrim e ka trashëguar nga i ati.  Dyert e ‘Top Channel’ nuk janë të panjohura për të. Ajo ka konkurruar dhe për të qenë velinë, si dhe për prezantuese të emisionit ‘Top Select’. Krahas muzikës i pëlqen edhe aktrimi.

Është studente kantoje në vitin e tretë. Ka lindur në Amerikë dhe është kthyer prej andej bashkë me familjen kur ka qenë 15 vjeç. Në Amerikë ka qenë në një shkollë muzike. Ka marrë pjesë në muzikale në shkollë dhe ka aktruar. Është shpesh pjesë e aktiviteteve muzikore në shkollë dhe jashtë saj. Thotë se nuk e ka pasion muzikën klasike dhe kjo është arsyeja që po vjen në “The Voice”, që të mund të këndojë zhanret që ajo dëshiron. I pëlqen të pikturojë dhe t’i bjerë pianos. Këtë vit provon shansin për herë të dytë.

Ka filluar të këndojë që shumë e vogël, e shtyrë nga i ati, i cili këndon live në lokale nate. Ka marrë pjesë në koncerte të ndryshme, në Elbasan dhe është angazhuar në ‘Teatrin Skampa’.  Shpesh, bashkë me motrën këndojnë me të atin në karaoken ku ai punon. Vjen në ‘The Voice’ për të kaluar provën e parë profesionale.

Të këndojë në krah të artistëve të mëdhenj botërorë, kjo është ëndrra e Majlindës, e cila vjen në ‘The Voice’ me një ego aspak modeste. Ajo në vijimësi ka marrë pjesë në festivale dhe koncerte të vogla, të organizuara në rang shkollash a qytetesh, por ajo kërkon sfida më të mëdha, sfida të cilat pse jo t’i ndryshojnë edhe jetën. Është pikërisht dëshira e saj për sfida, arsyeja kryesore që e sjell në ‘The Voice’,  me pikësynimin të këndojë dhe punojë me artistë profesionistë. Përveç muzikës, ajo merret edhe me vizatime, duke skicuar kryesisht skica në fushën e modës. Bota e modës e tërheq shumë dhe kjo është sipas saj dhe një burim frymëzimi në skicat e veshjeve që ajo hedh.

Student në Akademinë e Arteve, dega Muzikologji, viti II. Pasioni për muzikën i ka lindur që i vogël. Është marrë seriozisht me të dhe krahas studimeve ka marrë pjesë edhe nëpër festivale të rëndësishme në Shqipëri, ndër ta edhe Top-Fest. Për momentin këndon live, si pjesë e një bande muzikore, nëpër lokale dhe aktivitete ku i ftojnë. Muzikën nuk e ka të trashëguar, pasi asnjë nga familja e tij nuk merret me muzikë.