Në këtë kohë të vështirë për shkak të pandemisë të koronavirusit të gjithë janë në vështirësi shumë të mëdha. Ndërkohë, për asnjë ditë nuk e kanë lënë punën mjekët, infermierët, farmacistët, policia apo edhe gazetarët.
Ne jemi çdo ditë në terren këto ditë për një mision shumë të rëndësishëm që është informimi. Të gjithë shqiptarët në shtëpi përveç shqetësimit të përditshëm për shëndetin, kanë shqetësim ushqimin ndërsa informimi ka të njëjtën vlerë si ushqimi. Media është e vetmja rrugë komunikimi në këtë operacion të madh lufte, siç e quan kryeministri.
Dje kryeministri paraqiti paketën financiare të planit A të kësaj lufte dhe harroi njerëzit e medias duke I përjashtuar nga ndihma në një moment kur e gjithë media është në gjendje shumë të vështirë.
Unioni i Gazetarëve reagoi ndaj këtij qëndrimi të kryeministrit , ndërkohë ngre alarmin e fikje sinjaleve televizive të radio televizioneve nëse situate me Covid-19 zgjat.
“Mediat dhe gazetarët nuk mund të përjashtohen nga ndihma zoti Kryeministër: ky është diskriminim. Media shqiptare është sot në gjendje kolapsi, pasi të gjitha kompanitë reklamuese janë tërhequr. Asnjë biznes nuk bën reklamë në këtë kohë krize. Përjashtimi i mediave nga vendimi i qeverisë dhe indiferenca ndaj gazetarëve të punësuar në këtë sektor përbëjnë akt të pastër ndëshkues dhe penalizues për bukën dhe jetesën e gazetarëve dhe familjeve të tyre”.
Unioni i gazetarëve sjell në vëmendje se mediat dhe fjala e lirë janë arma e vetme kundër territ informativ, i cili paraqitet si një kërcënim konkret në ditët e luftës me pandeminë COVID-19 duke I ftuar te gjitha mediat dhe gazetarët dhe shoqatave aktive në mbrojtjen e të drejtave të gazetarëve dhe të lirisë së shtypit të bashkohen në reagim të përbashkët kundër këtij vendimi diskriminues të qeverisë. / Top Channel
Deklaratë e kryetarit të Unionit të Gazetarëve Shqiptarë (UGSH), gazetarit Aleksandër Çipa, ndaj vendimit të Qeverisë Shqiptare në kushtet e situatës së pazakontë të shkaktuar nga pandemia
Mediat dhe gazetarët nuk mund të përjashtohen nga ndihma zoti Kryeministër: ky është diskriminim.
Qeveria e kryesuar nga kryeministri Edi Rama, në kuadër të masave për përballimin e pasojave dhe emergjencës së shkaktuar nga pandemia COVID-19, ka vendosur që të paguajë të gjjthë punonjësit e bizneseve të mbyllur. Në draftin paraprak, në këto kategori, nuk është përfshirë sektori i medias. Mediat në vendin tonë, të regjistruara dhe taksapaguese si entitetet e tjera të biznesit, shërbejnë si burim të ardhurash mujore për mijëra të punësuar dhe, përtej ankesave të ritheksuara të UGSH, garantojnë sigurimet mujore të gazetarëve. Ky përjashtim për mediat dhe, rrjedhimisht, për gazetarët dhe punonjësit e thjeshtë bëhet pikërisht në një moment kur paraqitet një rrezik i theksuar falimentimi.
Media shqiptare është sot në gjendje kolapsi, pasi të gjjtha kompanitë reklamuese janë tërhequr. Asnjë biznes nuk bën reklamë në këtë kohë krize. Përjashtimi i mediave nga vendimi i qeverisë dhe indiferenca ndaj gazetarëve të punësuar në këtë sektor përbëjnë akt të pastër ndëshkues dhe penalizues për bukën dhe jetesën e gazetarëve dhe familjeve të tyre. Duhet ta themi se aktualisht, për shkak të kësaj krize, të gjitha televizionet dhe mediat audiovizive në përgjithësi, kanë reduktuar stafet, disa prej tyre edhe në masën 70%, pasi nuk kanë fuqi paguese.
Përjashtimi selektiv i entiteteve mediatike rrezikon të shndërrohet në një vullnet të pashprehur për të parë falimentimin dhe mbylljen e tyre. Mediat dhe fjala e lirë, pluralizmi dhe spektri informativ janë arma e vetme kundër territ informativ që paraqitet si një kërcënim konkret në ditët e luftës me pandeminë COVID-19.
Unioni i Gazetarëve Shqiptarë shpreh shqetësimin se nëse kjo situatë zgjat deri në fund të muajit prill, mediat, sidomos radio-televizionet, rrezikojnë të fikin sinjalin televiziv. Të njëjtin problem e kanë edhe mediat online, ku në një treg ende të parregulluar, nuk kanë asnjë burim financiar, përtej reklamuesve që po tërhiqen. Përjashtimi i mediave dhe gazetarëve nga vendimi i qeverisë është një dënim me varfëri dhe uri për gazetarët shqiptarë.
Unioni i Gazetarëve Shqiptarë fton të gjitha mediat, gazetarët dhe shoqatave aktive në mbrojtjen e të drejtave të gazetarëve dhe të lirisë së shtypit të bashkohen në reagim dhe denoncim tê përbashkët kundër këtij vendimi diskriminues të qeverisë shqiptare.
Aleksandër Çipa
Kryetar, Unioni i Gazetarëve Shqiptarë
Tiranë më 18.03.2020
