“Për’puthen” është padyshim një nga programet më të ndjekura në Shqipëri dhe nisur nga suksesi i këtij formati, produksioni ka menduar që të vijë me një tjetër version të tij, “Për’puthen” me konkurentët mbi 40 vjeç.
Fillimisht burime nga Top Channel e konfirmuan lajmin dhe më pas vetë autorja e programit, Olsa Muhameti, me anë të disa postimeve në Instagram. Kjo e fundit, e ftuar mbrëmjen e djeshme në Top Albania Radio në emisionin “Pardon My French”, përveçse foli për herë të parë për situatën e Andit dhe Teas, dha edhe detaje në lidhje me Për’puthen 40+.
Olsa u shpreh mjaft e entuziasmuar për nisjen e tij, duke thënë se këtë gjë e ka vënë re në fakt dhe tek publiku, që ka shfaqur shumë interes deri më tani. Ajo tregoi se do të ketë mjaft personazhe interesantë, ndërsa aktualisht stafi po bën fazën e dytë të audicioneve për konkurentët. Muhameti po ashtu zbuloi se në fakt ky program do të nisë më shpejt nga ç’pritet, brenda 3 javësh.
Një tjetër detaj është se në këtë format do të punësohet edhe një sociolog që do t’i ndjekë gjatë gjithë kohës.
E ndërsa produksioni punon që “Për’puthen” mbi 40 të nisë në kohën e duhur, ashtu siç është bërë me dije edhe më parë emisioni “origjinal” nuk do të ndalojë, por do të zhvillohen të dyja njëkohësisht.
