Ka kohë që në Media Vizion kishin filluar përgatitjet për një evolucion të transmetimit të kanalit kryesor Vizion Plus, madje muaj më parë IMA zbuloi se versioni HD duhej të kish filluar transmetimin në muajin tetor të vitit të kaluar. Duket se investimi ka kërkuar pak më shumë kohë për të ndezur dritën jeshile ditëve të fundit.
Kanali i tretë gjeneralist më i rendësishëm në Shqipëri do të ketë së shpejti programacionin e tij në formatin HD. Bëhet fjalë për transmetimin satelitor, ku ka filluar në fazë eksperimentale transmetimi i kanalit Vizion Plus HD, në frekuencën Eutelsat 16A (16.0E) 11427/V/27500. Kanali transmeton pa logo dhe mund të ndiqet vetëm nga ata që disponojnë një dekoder satelitor.
Nisja e transmetimit në formatin superior audio/video e Vizion Plus, në arenën e mediave kryesore mund të konsiderohet e vonuar, duke konsideruar që dy televizionet e tjera kombëtare gjeneraliste, TV Klan dhe Top Channel, kanë vite që trasmetojnë në formatin HD. Madje përparimi në këtë teknologji transmetimi është prekur edhe nga disa media lokale.
