Disa orë më parë revista online Class publikoi lajmin se gazetari dhe moderatori I njohur Adi Krasta pas mbylljes së Agon Channel ishte në negociata për të vazhduar emisionin e tij në Vizion Plus. I menjëhershëm ka qenë reagimi I Agon Channel nëpërmjet faqes zyrtare në Facebook, pas të cilit Revista Class ka hequr edhe postimin e publikuar.
Ja se çfarë shkruhet në faqen e Agon Channel:
Revista online “Class” ka publikuar lajmin se Adi Krasta kthehet në Vizion Plus. Zoti Krasta nuk ka bërë asnjë deklaratë publike dhe në djeninë tonë nuk ka asnjë negociatë për të kaluar në ndonjë stacion tjetër televiziv pas mbylljes nga shteti të Agon Channel. Ajo që kuptohet lehtësisht se tani po bëhen përpjekje të kujdesshme për të mbyllur edhe gojët individuale të gazetarëve të njohur në vend. Mungesa e reagimit të profesionistëve ndaj mbylljes së Agonit po pasohet me aksione konspirative në mediat e kontrolluara për të hedhur baltë mbi Agonin dhe njerëzit që kanë punuar e që nuk lejohen më të punojnë aty.
