Aktori i famshëm i humorit Agron Llakaj, mbrëmjen e të mërkurës ka qenë i ftuar special në një televizion grek. Nuk ndodh shpesh të lexojmë lajme të tilla, ku përfaqesues të medias apo të artit të jenë mysafir të mediave greke por humori i ideatorit dhe moderatorit të “Al Pazar” në Vizion Puls, ka kaluar kufijtë.
Emisoni “TA KARNTASIANS” që transmetohet në Antena ANT1, është një format Night Show mjaft i suksesshëm në Greqi, ku nuk mungon humori, batutat, komentet pikante. Figura të njohura greke dhe jo vetëm, janë të ftuar special në sallonin e këtij talk show. Agron Llakaj ka folur mbi sukseset e tij në Shqipëri, për spektaklin e humorit “Al Pazar” dhe ka interpretuar pjesë nga rolet e tij si dhe ka kënduar edhe në greqisht. Në fund të emisionit Agroni Llakaj ka dhënë një mesazh për popullin grek duke i ftuar ata që të tregojnë të njëtën dashuri që treguan vite më parë kur hapen dyert për popullin shqiptar.
