Anxhela Peristeri është një prej artisteve më të njohura shqiptare, e cila së fundmi i shtoi edhe një tjetër sukses karrierës së saj. Përpos hiteve të shumta dhe triumfit të pak viteve më parë në “Kënga Magjike”, Anxhela tashmë është edhe fituese e “Festivalit të Këngës” dhe do të na përfaqësojë në Eurovizionin e këtij viti. Këngëtarja ka qenë e ftuara e Alaudin Hamitit mbrëmjen e djeshme në programin “NIN”, ku ka folur për detaje nga jeta e saj profesionale dhe personale.
Ndër të tjera, ajo ka treguar edhe për pagesën më të lartë që ka marrë për të kënduar, në rubrikën “Haje ose Thuaje”. Peristeri u pyet për pagesën dhe mund të zgjidhte edhe të mos tregonte, por ajo nuk nguroi të tregonte:
“8 mijë euro”- ndërkohë që tha se ka pasur edhe vlera shumë më të ulëta se kaq.
Nga ana tjetër, Anxhela foli edhe për përfaqësimin e Shqipërisë në festivalin “Eurovision 2021”, ku tha se është e përgatitur për gjithçka. Kujtojmë se Peristeri mblodhi shumën më të madhe të pikëve nga juria e Festivalit të Këngës, duke grumbulluar 322 pikë nga votimi i 11 pjesëtarëve të jurisë.
Nëse jeni kuriozë edhe për ndonjë detaj nga jeta e sa private, artistja tregoi gjatë intervistës arsyen më serioze për të cilën është grindur me personin e zemrës, nëse ka ose ka patur sigurisht.
“Unë s’kam qenë pa person zemre, kështu që mund të të jap shumë arsye grindjeje. E vetmja gjë që më acaron është xhelozia, për këtë mund të grindem. Pastaj në qoftë se personi i zemres grindet për gjëra të tjera, atëherë duhet të pyesni atë”.
