Bota e muzikës greke është në zi. Giorgos Mazonakis, një prej këngëtarëve më të njohur dhe më të dashur të skenës greke, është ndarë nga jeta në moshën 54-vjeçare pas një arresti kardiak.
Sipas mediave greke, këngëtari u transportua me ambulancë në spitalin “Elpis” në Athinë, ku mjekët konstatuan vdekjen e tij. Njoftimi i spitalit bëri të ditur se ai kishte mbërritur pa frymëmarrje dhe pa puls.
Mazonakis ishte dërguar në spital nga një klinikë private në Kolonaki, ku fillimisht ishte përpjekur t’i jepej ndihma e parë pas arrestit kardiak.
I lindur në Nikaia në vitin 1972, ai nisi karrierën muzikore në fillim të viteve ’90 dhe u kthye shpejt në një nga emrat më karakteristikë të muzikës moderne greke. Stili i tij ndërthurte elementë të muzikës pop me traditën laiko, ndërsa energjia në skenë dhe zëri i veçantë e bënë një prej artistëve më të dallueshëm të brezit të tij.
Gjatë karrierës së tij ai performoi gjerësisht në Greqi, Qipro dhe për komunitetet greke jashtë vendit, përfshirë Gjermaninë, Australinë dhe Shtetet e Bashkuara.
Lajmi për vdekjen e tij vjen vetëm pak ditë përpara një koncerti të planifikuar më 20 shtator në Technopolis, ku Mazonakis do të festonte me publikun 33-vjetorin e rrugëtimit të tij muzikor. Postimi ku promovonte këtë koncert ishte ndër të fundit që kishte publikuar në rrjetet sociale.
Për publikun shqiptar, Mazonakis ishte gjithashtu një emër mjaft i njohur, falë popullaritetit të madh që muzika greke ka pasur prej vitesh në Shqipëri dhe rajon.
