Për gati 36 vite, IMDb ka qenë një nga databazat kryesore të industrisë së filmit dhe televizionit, ku një emër lidhej kryesisht me role në kinema, seriale apo produksione televizive. Tani platforma po zgjeron ndjeshëm kufijtë e saj.
IMDb po prezanton për herë të parë kategorinë profesionale “Digital Creator”, e cila do të shfaqet si në IMDb ashtu edhe në IMDbPro. Kjo do të thotë se krijuesit që kanë ndërtuar karrierën e tyre përmes YouTube, TikTok, Instagram dhe platformave të tjera digjitale mund të kenë një identitet profesional më të strukturuar brenda databazës.
Nga rrjetet sociale në databazën e Hollywood-it
Lëvizja është domethënëse sepse kufiri mes një “influencer-i” dhe një figure tradicionale të entertainment-it është bërë gjithnjë e më i paqartë.
Creator-at tashmë prodhojnë seriale, filma, podcaste, formate entertainment-i dhe projekte me buxhete të konsiderueshme. Disa prej tyre po kalojnë drejtpërdrejt nga YouTube apo TikTok në Hollywood, ndërsa studiot po i përdorin gjithnjë e më shumë edhe për promovimin e filmave.
Vetëm gjatë këtij viti, creator-at kanë pasur një rol gjithnjë e më të madh në industrinë e filmit, si në marketing ashtu edhe si autorë dhe producentë të projekteve të tyre. Washington Post vëren se creator-at janë bërë pjesë e rëndësishme e debatit për të ardhmen e Hollywood-it dhe mënyrën se si filmat arrijnë te audiencat e reja.
Çfarë ndryshon konkretisht?
Sipas informacionit të raportuar nga Variety, përcaktimi “Digital Creator” do ta bëjë më të lehtë identifikimin dhe kërkimin e këtyre profesionistëve në IMDb dhe IMDbPro.
Ky është një hap më i rëndësishëm nga sa mund të duket. IMDbPro përdoret profesionalisht nga aktorë, producentë, agjentë, casting directors dhe kompani të industrisë. Vetë IMDb shpjegon se faqet profesionale të emrave shërbejnë për të paraqitur portofolin e një personi, biografinë, projektet dhe informacionet e lidhura me karrierën e tij.
Pra, creator-i nuk shihet më vetëm përmes numrit të followers-ave në një platformë sociale, por gjithnjë e më shumë si një profesionist i industrisë së entertainment-it.
Një sinjal edhe për tregun shqiptar
Ndryshimi është interesant edhe për Shqipërinë, ku vitet e fundit është rritur ndjeshëm numri i personazheve që kalojnë nga rrjetet sociale në televizion, muzikë, reality show, filma apo formate të tjera entertainment-i.
Vendimi i IMDb është në njëfarë mënyre edhe konfirmim i një transformimi më të madh: YouTube, TikTok dhe Instagram nuk janë më vetëm kanale promovimi. Për një brez të ri, ato janë vendi ku fillon vetë karriera në media.
