Arbërishtja njihet si gjuhë zyrtare e pakicave në rajonin e Abrucos, në Itali. Vendimi është marrë sot nga Këshilli Rajonal i Abrucos.
Presidenti Ilir Meta nëpërmjet një njoftimi në rrjetet sociale ka shprehur mirënjohje për kryetarin e Bashkisë Arbëreshe të Villa Badessas, z. Simone Ballozo dhe rëndësinë që ka mbrojtja dhe promovimi i trashëgimisë kulturore arbëreshe.
Postimi i presidentit
Me kënaqësi të madhe mora vesh lajmin se Këshilli Rajonal i Abrucos votoi sot njohjen e arbërishtes si gjuhë zyrtare të pakicave në këtë rajon të Italisë.
Mirënjohje Kryetarit të Bashkisë Arbëreshe të Villa Badessa, z.Simone Ballozo që inkurajoi dhe mbështeti konkretizimin e këtij vendimi tepër të rëndësishëm, që i forcon edhe më shumë marrëdhëniet e shkëlqyera të Shqipërisë me Italinë.
Është me rëndësi që trashëgimia e jashtëzakonshme kulturore arbëreshe, kjo pasuri e përbashkët e dy vendeve dhe popujve tanë, të mbrohet dhe promovohet.
Gjuha arbëreshe që flitet prej shekujsh duhet të vazhdojë të jetojë, ndaj ne mirëpresimin njohjen e saj si gjuhë zyrtare të pakicave edhe në rajonet e tjera të Italisë ku jetojnë arbëreshët.
