Arjan Konomi, i cili muajt e fundit ka qenë i angazhuar si opinionist i një prej programeve më të ndjekura në Shqipëri, “Për’puthen”, ka dhënë një intervistë së fundmi i ftuar në emision “Kojshia Show”. Ai tregoi shumëçka gjatë bisedës në studio, përtej rolit në “Për’puthen” dhe historive që ndodhin aty, ndërsa rrëfeu eksperiencat si gazetar gjatë karrierës shumëvjeçare, por edhe disa detaje nga jeta personale.
Konomi u ndal gjatë në një moment, që sipas tij i ka shënuar jetën, madje u emocionua kur e kujtoi, e cili kishte të bënte pikërisht me Kosovën dhe kohën kur sapo kishte nisur lufta me Serbinë. Bëhet fjalë për vitin 1998, kur UÇK-ja po dilte në skenë dhe Arjani si gazetar për një media italiane kishte udhëtuar në Kosovën e athershme, e cila ende kontrollohej nga milicia serbe. Pavarësisht se shumë kishin reaguar të habitur për vendimin e tij, ai sërish kishte rrezikuar, ndërsa rrëfeu se kryeministri i tamnishëm Albin Kurti i kishte shpëtuar jetën.
“Kam shkuar në Kosovë shumë herët, madje kam rrezikuar edhe jetën disa herë. Albin Kurtin dhe Bujar Dugollin i kam njohur që atëherë kur ishin student, ata studentë me shpresa të mëdha, në krye të protestave. Në një moment mbeta keq në stacionin e autobusëve, kur doja të shkoja tek Hotel Grandi dhe aty pranë ishte banda e Arkanit. Ishte milicia serbe dhe unë nuk po arrija të kontaktoja me Albinin se kisha ardhur, nuk kishim ende celular në atë kohë, as e-mail. Kisha vetëm një mënyrë për ta kontaktuar Albinin që ma kishte dhënë një italiane, ndërlidhsja jonë. Më ka shpëtuar dikush, që sotë është një mik i imi, Fadil Ismajli. Po ta zbulonte milicia se kisha pasaportë të Shqipërisë, jeta ime ishte në rrezik. Mund të më vrisnin serbët. Pastaj Albini më strehoi te një familje te Kodra e Trimave, që jam munduar ta kujtoj emrin, por nuk mundem. Që atje pastaj kam lëvizur për në Prizren, Gjakovë e Pejë dhe në vendin ku kam kaluar aventurën më të bukur, Drenicë. Për aq sa mund të quhet e bukur sot.”
Konomi u shfaq i emocionuar, teksa fliste për faktin se si Kombi ynë është ndarë dhe si koha që ka kaluar në Kosovë atëherë e ka bërë shumë më patriot. Ndërkohë moderatoi i emisionit i ka kujtuar atij kohën, kur debadonte në “”RaiDue” me politikanët italianë për historinë e Kosovës dhe konfliktin me Serbinë.