Armando Sadiku u rikthye në kombëtare pas disa kohësh, por nuk luajti dot asnjë minutë në kualifikuesen e mbrëmshme të Minskut, kundër Bjellorusisë. Ndeshje e fituar me meritë 2-0 nga kuqezinjtë tanë, kjo. Sidoqoftë, një “sihariq” i mirë ka ardhur për elbasanasin, teksa klubi turk i Erzurumspor e ka zyrtarizuar si futbollist të vetin për sezonin e ri. Një kthesë e papritur, sepse para dy ditësh konsiderohej punë e kryer marrëveshja e tij me Samsunspor.
Pra, pas eksperiencës spanjolle, Sadiku do të provojë kampionatin turk. Sa për informacion, skuadra e re e sulmuesit shqiptar sapo është ngjitur në elitën e futbollit turk. Ja njoftimi i Erzurumspor me këtë rast: “Ne ramë dakord parimisht me Armando Sadikun. Pasi të përfundojnë ndeshjet me ekipit kombëtar, lojtari do të vijë në Erzurum, të kryejë kontrollin shëndetësor dhe të bashkohet me ekipin tonë. Fat i mirë për komunitetin tonë!”
