Aktori, i famshëm me rolin e Ross në “Friends”, do të marrë pjesë në serialin televiziv të autores dhe aktores angleze Julia Davis.
David Schwimmer, Ross në serialin Friends, rikthehet në tv. Aktori amerikan ka pranuar të jetë pjesë e cast-it të sitcom-it të ri anglez Morning Has Broken, i shkruar dhe interpretuar nga Julia Davis.
Seriali do të transmetohet në kanalin Channel 4 në 2016. I prodhuar nga Brown Eyed Boy, seriali parashikohet të ketë 6 episode me nga 30 minuta.
Historia rrëfen jetën e yllit të ekranit Gall Sinclair, interpretuar nga Davis. Schwimmer do të jetë producenti amerikan i angazhuar posaçërisht për të shpëtuar serialin nga ndjekshmëria e ulët. Një rol që nuk do të jetë i vështirë për t’u interpretuar, duke patur parasysh që në jetën e vërtetë ka qenë disa herë producent, si edhe aktor, serialesh tv dhe shfaqjesh teatrale.
Pas shumë vitesh përpjekje dhe role dytësore, aktori amerikan u bë i famshëm me rolin e Ross Geller në 286 episodet e Friends. Seriali debutoi në 1994 në kanalin NBC duke u bërë një fenomen televiziv botëror. I transmetuar në Shqipëri disa vite më parë nga Top Channel, sot seriali mund të ndiqet në Report TV.