Telekomi i Kosovës ka reaguar pas diskutimeve dhe kritikave të ditëve të fundit lidhur me transmetimin e ndeshjeve të Kupës së Botës FIFA 2026, duke sqaruar mënyrën se si qytetarët do të kenë qasje në përmbajtjen e turneut më të madh të futbollit.
Përmes një komunikate për media, kompania njoftoi se ka siguruar të drejtat ekskluzive të transmetimit të Botërorit 2026 për territorin e Republikës së Kosovës, duke theksuar se pjesa më e madhe e ndeshjeve do të jetë e qasshme pa pagesë shtesë për publikun.
Sipas Telekomit të Kosovës, 64 nga gjithsej 104 ndeshje të Kupës së Botës do të transmetohen falas në Radiotelevizionin e Kosovës (RTK), duke u mundësuar qytetarëve ndjekjen e pjesës më të madhe të turneut pa asnjë kosto shtesë.
Ndërkohë, mbi 20 mijë abonentë të shërbimeve fikse të Telekomit të Kosovës do të kenë qasje në të gjitha 104 ndeshjet si pjesë e paketave që përdorin aktualisht.
Për 40 ndeshjet e mbetura, të cilat do të transmetohen ekskluzivisht, kompania ka vendosur një tarifë të vetme prej 20 eurosh për të gjithë turneun. Sipas njoftimit, kjo ofertë do të jetë e disponueshme për të gjithë përdoruesit e internetit në Kosovë, pavarësisht operatorit nga i cili marrin shërbimet.
Telekomi i Kosovës bëri të ditur gjithashtu se u ka ofruar operatorëve të tjerë mundësinë e bashkëpunimit komercial për të përfshirë përmbajtjen e plotë të Botërorit në platformat e tyre televizive.
“Konsiderojmë se pretendimet se qytetarëve të Kosovës u është pamundësuar ndjekja e Kupës së Botës nuk qëndrojnë”, thuhet në reagimin e kompanisë, e cila thekson se kombinimi i transmetimeve në RTK, qasjes për abonentët e saj dhe ofertës së hapur për publikun siguron mbulim sa më të gjerë të ngjarjes sportive.
Telekomi i Kosovës deklaroi se do të vazhdojë investimet në përmbajtje sportive, teknologji dhe shërbime të avancuara, duke mbajtur të hapur ofertën për individët dhe operatorët që dëshirojnë të kenë qasje në të gjitha ndeshjet e Kupës së Botës FIFA 2026.
