Poetja e njohur Mimoza Ahmeti është shpallur fituese e edicionit të tretë të “Ferma VIP”, duke mbyllur me triumf një rrugëtim më shumë se tre mujor, të ndjekur me shumë interes nga publiku shqiptar.
E pranishme në fermë që nga dita e parë, Moza ndërtoi një rrugëtim unik, duke u kthyer në një nga personazhet më të komentuara dhe më të dashura të këtij sezoni. Me personalitetin e saj të veçantë, reflektimet filozofike dhe emocionet e forta që ndau me publikun, ajo arriti të fitojë zemrat e teleshikuesve.
Në përballjen finale, Mimoza Ahmeti u përball me Ilir Shaqirin në televotimin vendimtar, pas eliminimit të finalistëve të tjerë. I pari që la garën ishte DJ Bujaka, i cili u rendit në vendin e pestë. Më pas, publiku vendosi që Soni Malaj ta mbyllte garën në vendin e katërt, ndërsa Elvis Pupa në vendin e tretë, duke lënë në garë dy finalistët e fundit.
Finalja e madhe, nën drejtimin e Arbana Osmanit dhe prodhimin e “Vita Production”, solli emocione, surpriza dhe rikthime pas në kohë përmes rrëfimeve dhe kujtimeve të finalistëve. Pesë finalistët, Mimoza Ahmeti, Ilir Shaqiri, Elvis Pupa, Soni Malaj dhe DJ Bujaka, përjetuan një natë spektakolare, që kulmoi me kurorëzimin e fitueses së këtij edicioni.
“Ferma VIP 3” mbylli kështu një nga sezonet më të suksesshme, duke sjellë jo vetëm garë për çmimin e madh, por edhe miqësi, përballje, rrëfime njerëzore dhe momente që do të mbeten gjatë në kujtesën e publikut.
Finalja nuk tërhoqi vetëm vëmendjen e teleshikuesve shqiptarë, por edhe të përfaqësuesve ndërkombëtarë të formatit. E pranishme në natën finale ishte Andrea Gavacova, drejtoreshë e Fremantle Media për Europën Qendrore dhe Lindore, e cila vlerësoi mënyrën se si formati është realizuar në Shqipëri.
Sipas saj, “Ferma VIP” jo vetëm që përmbush standardet ndërkombëtare të formatit, por në disa aspekte i tejkalon ato, falë investimit në prodhim, përzgjedhjes së konkurrentëve, mbulimit 24 orë të jetës në fermë, prime-ve me vlera të larta televizive, teknologjisë së fundit dhe efekteve speciale.
“Jam shumë e lumtur që ndodhemi sot këtu për finalen e Fermës. Mendoj se ky format jo vetëm që i përmbush të gjitha standardet, por i tejkalon ato në mënyrën më pozitive të mundshme”, u shpreh Gavacova.
Ajo theksoi gjithashtu se “Ferma VIP” renditet ndër formatet më të suksesshme ndërkombëtare, krahas “Got Talent”, duke e cilësuar si një nga produktet më të forta televizive.
“Ky është vërtet një nga formatet më të njohura, së bashku me ‘Got Talent’ dhe disa të tjerë. Për mua, ky është standardi i artë”, tha ajo.
Gavacova vlerësoi edhe ndikimin e madh që “Ferma VIP” ka krijuar në platformat digjitale dhe rrjetet sociale, veçanërisht në YouTube, duke e konsideruar këtë një tregues të rëndësishëm të fuqisë së markës dhe lidhjes me publikun.
Vlerësimet e përfaqësuesve ndërkombëtarë konfirmojnë suksesin e “Ferma VIP” në Shqipëri, duke e kthyer atë në një nga produksionet më të ndjekura dhe më të komentuara në hapësirën shqiptare.
