Tashmë që digjitalizimi i televizionit ka nisur zyrtarisht edhe në Shqipëri, nga 1 dhjetori, sfida të reja i presin edhe gjigandët e medias të cilët falë teknologjisë së re do të duhet të përballen me kërkesën e publikut për më shumë programe.
Falë shfrytëzimit të DVB-T, numri i kanaleve do të shtohet dhe konkurenca midis operatorëve kryesorë në vend do të jetë edhe më e fortë. Duke nisur nga RTSH e cila fillimisht do të nisë transmetimin e 12 kanaleve, për të vazhduar me Top Channel, ende i pavendosur numri i kanaleve free-to-air që do të verë në dispozicion, Vizion Plus me Vizion+ HD, Kanali 7, Click dhe TV Klan, i cili aktualisht transmeton 4 kanale në digjitalin tokësor (Klan HD, ABC News, Klan Plus dhe Klan Kosova). Ky i fundit duket se ka filluar që tashmë të mendojë për evolucionin e vëllait të vogël Klan Plus.
Sipas burimeve të InfoMedia Albania, drejtuesit e Klan janë duke projektuar të ardhmen e Klan Plus në një kanal tematik me një target referuar një publiku rinor. Së fundmi Klan Plus ka filluar transmetimin në formatin HD dhe programacioni i tij përmban vetëm filma. Pritet që viti 2017 të jetë edhe ndryshimi rrënjësor i këtij kanali i cili do të pasurojë programacionin e tij me emisione, seriale ndërkombëtar të pa transmetuar më parë në Shqipëri.
