Ermal Mamaqi, i njohur në botën e spektaklit dhe kinematografisë, ka reaguar zyrtarisht lidhur me akuzat e fundit për përfshirje në një skemë të pastrimit të parave. Me një deklaratë të fortë dhe të qartë, ai ka mohuar kategorikisht çdo akuzë, duke shpjeguar se nuk ka bërë asnjë shkelje ligjore. Gjithashtu, ai ka bërë të ditur se do të marrë masa ligjore kundër çdo subjekti që ka kontribuar në përhapjen e këtyre lajmeve të pavërteta, të cilat kanë shkaktuar dëme të konsiderueshme psikologjike, morale dhe ekonomike për të.
Në një status të plotë në rrjetet sociale, Mamaqi iu drejtohet fansave dhe dashamirësve të tij, duke bërë thirrje për përgënjeshtrimin e lajmeve dhe duke paralajmëruar ndjekje ligjore për ata që kanë përhapur informacionin e rremë. Ai thekson se nuk trembet nga e vërteta, pasi puna dhe arti i tij flasin për veten.
Duke mbyllur këtë kapitull, Mamaqi njofton gjithashtu se së shpejti do të sjellë dy projekte të reja filmike dhe trajnime vetëzhvillimi. Ky njoftim vjen si një lajm i mirë për të gjithë ata që e kanë mbështetur gjatë kësaj periudhe të vështirë. “Këto janë punët e vetme që di të bëj dhe falë tyre gëzoj çdo gjë që kam,” shprehet ai, duke u shprehur optimist për të ardhmen.
