Pas gati një muaji nga njoftimi i mjekut ligjor se ylli i “Friends”, Matthew Perry, vdiq nga “efektet akute të ketaminës”, Departamenti i Policisë së Los Anxhelosit ka konfirmuar për revistën “People” se hetimi për vdekjen e tij është mbyllur zyrtarisht. Ky vendim vjen pasi Ekzaminuesi Mjekësor i Qarkut Los Angeles njoftoi në faqen e tij të internetit se rasti tashmë është konsideruar “i mbyllur”.
Matthew Perry, i njohur për rolin e tij si Chandler Bing në serinë televizive të famshme “Friends”, u gjet i vdekur në xhakuzin e shtëpisë së tij më 28 tetor 2023, në moshën 54 vjeçare. Autoritetet konfirmuan se aktori kishte ndërruar jetë para se ekipet e emergjencës mjekësore të arrinin në vendngjarje.
Mjekja ligjore, në raportin e saj, ka përmendur jo vetëm ketaminën si shkak kryesor të vdekjes, por edhe faktorë të tjerë që mund të kenë kontribuar. Ndër to përfshihen mbytja, sëmundja e arterieve koronare, si dhe efektet e buprenorfinës, një opioid sintetik i përdorur në trajtimin e varësisë nga drogat. Ky raport i detajuar hedh dritë mbi kompleksitetin e rrethanave që rrethuan humbjen tragjike të një figure të dashur të botës së televizionit.
