Kënga “Dajo,” e cila i siguroi këngëtarit të njohur Ervis Behari suksesin në tregun muzikor, fsheh pas vetes një histori të thellë dhe emocionale, që është zbuluar nga vetë artisti gjatë një interviste në emisionin “Ftesë në 5” në Top Channel.
Behari tregoi se kënga është frymëzuar nga një ngjarje e dhimbshme në jetën e tij: ndarja nga jeta e nënës së tij. Vetëm një vit përpara krijimit të këngës, nëna e Ervisit ndërroi jetë, duke i lënë atij një amanet të veçantë: ta mbante dajën e tij si vëlla, mik dhe shok.
“Kënga erdhi pas një momenti të vështirë, sepse nëna ime ka ndërruar jetë disa vite më parë. Unë isha i ri, 22 vjeç, dhe akoma s’e kisha marrë këngën në rrugën artistike,” – tha Ervisi me emocione të dukshme gjatë intervistës.
Behari shpjegoi se njëri nga dajat e tij u bë një mbështetje e madhe për të, jo vetëm emocionalisht por edhe financiarisht. Kjo mbështetje ishte thelbësore për krijimin e këngës “Dajo,” e cila erdhi në një kohë kur Ervisi nuk kishte mjetet e duhura për ta realizuar.
“Kam bërë këtë këngë dhe nuk kisha lekë. Daja ka qenë një suport i madh, ka qenë më i afërt dhe në atë periudhë. Mblodha sa munda dhe kam bërë këngën e “Dajës” një vit më vonë, e cila rezultoi shumë e suksesshme. Me dajën kemi një marrëdhënie shumë të ngushtë me njëri-tjetrin. Kush zgjohet i pari, i thotë tjetrit “mirëmëngjes”. Është e rrallë të kesh një marrëdhënie të tillë…”, – shtoi ai.
Kënga “Dajo” nuk është vetëm një sukses muzikor për Ervis Behari, por edhe një testament i dashurisë dhe lidhjes së fortë familjare që ai ndan me dajën e tij, duke i dhënë një dimension të veçantë emocional kësaj krijimi.
