Fituesja e Festivalit Europian 2013 do të jetë kumbarja e edicionit të 52-të të Festivalit të Këngës në Radiotelevizionin Publik Shqiptar, që do të zhvillohet në datat 26, 27 dhe 28 dhjetor. Bëhet fjalë për këngëtaren nga Danimarka Emmelie Charlotte-Victoria de Forest, e cila fitoi Festivalin Europian të këtij viti me këngën “Only Teardrops”. Emilie do të jetë e ftuara speciale e festivalit shqiptar. Ajo do të ngjitet në skenë e shoqëruar nga grupi i saj, për të sjellë për publikun shqiptar këngën që i dha fitoren dhe e çoi Eurosongun në vendin e saj, në Danimarkë, ku do të shkojë edhe përfaqësuesi i Shqipërisë. Fituesi do të përzgjidhet mes 16 këngëve, të cilat do të këndohen të gjitha live, shoqëruar nga orkestra, që për të tretin vit interpreton 100% drejtpërdrejt nga salla e Pallatit të Kongreseve.
Te ftuarit “Big”
Më pak se dy javë na ndajnë nga edicioni i 52-të i Festivalit të Këngës në Radiotelevizionin Publik Shqiptar. Një edicion që do të ketë më pak këngë se çdo herë tjetër, vetëm 16, por sipas organizatorëve, kjo nuk do të thotë se festivali do të jetë më i varfër. Tashmë gjithçka është drejt përfundimit. Skema se si do të funksionojë festivali është e qartë. Është hedhur shorti mes këngëtarëve për radhën e të kënduarit përgjatë dy netëve të para. Dy netët e para do të këndohen nga tetë këngë. Por nuk mbaron këtu. Në skenën e Festivalit të Këngës do të jenë të pranishëm edhe artistë të njohur, apo siç thuhet rëndomë “Big”, të cilët do të këndojnë duete me konkurrentët e këtij viti. Nuk bëhet fjalë për dublime të këngëve konkurruese, siç ka ndodhur në ndonjë edicion të shkuar, por për një risjellje të këngëve të njohura, të kënduara përgjatë viteve në skenën e Festivalit të RTSH-së. Kështu, pas çdo kënge konkurruese, këngëtari në garë do të vijojë të mbetet në skenë, për të pritur një tjetër këngëtar. Tashmë janë përcaktuar të gjitha kombinimet e këngëtarëve. Të gjithë artistët që do të ngjiten në skenë janë nga ata që kanë lënë gjurmë në historinë e Festivalit, fitues çmimesh, apo emra shumë të dashur për publikun. Mjafton të përmendim emrat si Rovena Dilo, Eranda Libohova, Altin Goci, Flaka Krelani, Juliana Pasha, tenori Kastriot Tusha, Elton Deda, Kejsi Tola, Redon Makashi, Eneda Tarifa dhe Kamela Islami, për të besuar se festivalit nuk do t’i mungojë spektakli, por edhe nostalgjia që do të sjellin këngët e nxjerra nga arkivat e këtij eventi.
Prezantuesit
Ndërsa zakonisht drejtuesit e festivalit mbeten për në minutën e fundit, këtë vit emrat janë zbuluar herët. Për të krijuar një lloj qëndrueshmërie në prezantim, çka i ka munguar historikisht këtij festivali, për të dytin vit rikthehet gazetari Enkel Demi. Ai vjen i shoqëruar nga një tjetër bukuroshe, një ikonë e modës, por jo më në Shqipëri, por në Kosovë. Bëhet fjalë për Diellza Kolgecin, e cila alternon profesionin e saj prej avokateje me botën e modës dhe të spektaklit. Këtë vit drejtor i Festivalit do të jetë Alfons Zeneli, njëherësh edhe drejtor i Radio Tirana. Drejtorët artistikë të Festivalit do të jenë Edmond Zhulali dhe Shpëtim Saraçi, producent muzikor do të jetë kompozitori Alfred Kaçinari, skenaristë Alda Bida ndërsa regjia e festivalit të këtij viti i është besuar Petri Bozos. Skenografia e festivalit në RTSH është realizuar nga Adnan Kastrati. Juria që do të gjykojë këngët gjatë netëve të festivalit mbahet ende e fshehtë, për të shmangur ndërhyrjet e mundshme për votimin në natën finale.
Duetet
Altin Goci me Edmond Mancakun dhe Entela Zhulën;
Flaka Krelani me Saimir Brahon;
Rovena Dilo me Klodian Kacanin;
Mira Konçi me Luiz Ejllin;
Juliana Pasha me Marjeta Billon;
Kastriot Tusha me Herciana Matmujën;
Elton Deda me Rezarta Smajën;
Kejsi Tola me Renis Gjokën;
Redon Makashi me Xhejn dhe Enxhi Kumrija;
Eneda Tarifa me Grupin LYNX;
Eranda Libohova me Xhejs Jorgaqin;
Kamela Islami me Orges Toçen;
Panorama ALMA MILE
