Kush shkoi ku? Cili emision vazhdon? Cili u mbyll? Kë do zgjedhin të shohin darkave shqiptarët? Gara mes ekraneve ka filluar dhe këtë vit duket e fortë. Disa programe kanë marrë përforcime, shumë figura televizive kanë lëvizur, emisione të reja priten dhe shumë luftë për audiencë, në emër të së cilës televizionet kanë gjithë verës që zhurmojnë e mprehin shpatat për garën e madhe të sezonit të ri televiziv që fillon nga shtatori.
Pas thashethemeve të verës për lëvizjen e moderatorëve nga njëri ekran në tjetrin, Klani i pari njoftoi zyrtarisht sezonin e ri, por jo me ndonjë ndryshim të madh. Pika e fortë e të gjithë televizioneve, orari prime time, në Klan nuk ka ndonjë ndryshim. Programet e darkës fillojnë çdo natë me Saimirin dhe Gentin me “Stop”, e pastaj vazhdojnë sipas ditës së javës: Opinion, Zonë e Lirë dhe seriale të reja me dashuri, intriga, shpata. Dyshja Vera-Alketa risjell sezonin e ri të “Dance with me”. Ermal Mamaqi nuk do të ulë më personazhe në kolltukun përballë skrivanisë së tij në “Xing me Ermalin”, por thuhet se do të rikthehet sezonin e dytë. E diela nuk ndryshon, është sërish e familjes Hysko, Turit dhe Orindës, që drejtojnë “Familja”. Kurse e shtuna sjell një show të ri, që ka rikthyer të shumëpërfolurën për një vit të tërë, Marina Vjollcën, e cila do t’i bashkohet trupës së humoristëve që sezonin e kaluar bënin “Duplex”. Këtë vit programi ka ndryshime dhe vjen me një logo të re “Klanifornia”, në të njëjtën mbrëmje kur përballë, në Vizion Plus është “Al Pazari” i Agron Llakajt, i cili ka një audiencën e vet besnike që e sheh prej vitesh rregullisht.
Më i mistershëm këtë fillim sezoni shfaqet Top Channel. Promot e emisioneve të paradites dhe pasdites kanë filluar, por programacioni i prime time ende nuk është bërë i qartë. Rikthehet Luana por nuk dihet nëse do të moderojë sërish “Shiko kush luan” apo një tjetër format. Në fotot që ka shpërndarë, realizuar në studiot e Top Channel, ka lajmëruar se diçka e re po vjen. Edhe Arbana Osmani i bëri të gjithë të dyshojnë kur postoi disa foto nga Big Brother, edhe pse qartë tregoi se nuk dinte nëse programi që shqiptarët e pëlqejnë shumë, do rikthehet apo jo këtë vit. Ndërkaq, as “Dua të të bëj të lumtur” nuk e ka shpallur qartë rikthimin në sezonin e parë apo në të dytin, në janar. Studiot e Top Channel janë duke u shndërruar për kuzhinën e chef Renatos, i cili rikthehet për një sezon të dytë të “Hell’s Kitchen”. “Portokallia” me Xhemin dhe Salsanon vazhdon të ketë të dielën tradicionale. Kabareja e humorit ende vazhdon të ketë ndjekës të përkushtuar çdo të diel në darkë. Të paktën nga ky semafor nuk duket se do ketë ndonjë ndryshim.
Por s’kemi ku shkojmë pa mbrëmjet e debatit dhe aktualitetit. Shtëpitë e shqiptarëve nuk kanë kuptim pa një çikë politikë, që ekranet e servirin me bujari dhe lufta e vërtetë e ekraneve të mëdhenj duket se është pikërisht aty, tek emisionet dhe studiot e gazetarëve me emër. Gara këtë vit duket vërtet e ashpër mes tyre. Studiove të përditshme apo të përjavshme iu shtohet një konkurrent i fortë: Rikthehet Ilva Tare me program të përditshëm nga e hëna në të premte me aktualitetin e ditës, në televizionin e ri Euronews, i cili do t’u hyjë në pjesë të tjerëve edhe me programe të tjerë e sidomos me aktualitet e lajme. Ndërkohë që “Real Story” i Sokol Ballës do të zhvendoset drejt News 24, nga e hëna në të enjte. Nga ana tjetër, në Klan mbrëmjet e aktualitetit nuk ndyshojnë, vijojnë me katër herë në javë me “Opinion” nga Blendi Fevziu, kurse në Top Channel, Eni Vasili dhe “Open” vazhdojnë pa ndryshime edhe këtë sezon. Gara këtë vit bëhet e fortë sepse i kemi të gjithë në garë për shifrat e famshme që dalin në fund nga grafikët e audiencës./Tiranapost.al
