Një prej figurave kryesore të Klan Kosovës braktisë televizionin e Shkëlqim Devollit
Shtëpia mediatike e biznesmenit Shkelqim Devolli, Klan Kosova, nga ky muaj ka humbur një prej figurave kryesore, nga fillimi, të këtij ekrani. Fjala është për gazetarin Kushtrim Sadiku, që prej vitesh drejtonte emisionin e tij, ndër më të shikuarit në këtë kanal, ‘Info Magazine’.
Gazeta Online ‘Reporteri.net’ merr vesh se gazetari Kushtrim Sadiku, nga data 1 shtator e këtij viti ka përfunduar bashkëpunimin e tij me Klan Kosova, pas më shumë se 11 vitesh punë në këtë televizion.
Vendimi për largimin e tij nga ky televizion ka ardhur në javët e fundit, kur edhe është njoftuar menaxhmeti për dorëheqjen e tij.
I kontaktuar nga Reporteri.net, Kushtrim Sadiku nuk ka folur për largimin e tij. Ka kërkuar të mos shqetësohet me pyetje, për shkak se ndodhet në pushime.
Megjithatë, edhe pse nuk është bërë ende publik largimi i tij nga ky televizion, Kushtrim Sadiku që nga fillimi i muajt gusht nuk është paraqitur në drejtimin e emisionit të tij ‘Info Magazine’, duke u zëvendësuar në prezantim nga një tjetër gazetare – Linda Dedinca.
Sadiku është figura e dytë kryesore e Klan Kosovës, që largohet brenda një periudhe të shkurtë nga televizioni në pronësi të oligarkut Shkelqim Devolli, shkruan Reporteri.net.
Në fillim të këtij viti, ky televizion u braktis edhe nga themeluesi i tij dhe ish-drejtori Baton Haxhiu. Ky i fundit u zëvendësua me gazetarin Adriatik Kelmendi, i cili la Kohavisionin për të marrë drejtimin e Klan Kosovës, duke e marrë me vete edhe emisionin e tij ‘Rubikon’ për të zënë vendet e shfaqjes së emisioneve të Haxhiut ‘Zona e Debatit’ dhe ‘Zona B’.
Haxhiu pas largimit tha se qëndrimi i tij në këtë televizion rrezikonte punëtorët për shkak të tij.
