Genc Salihu është kantautori nga Kosova që në edicionin e katërt të “The Voice of Albania” pason Elton Dedën.
33-vjeçari, i cili është bërë i njohur me grupin “Cute Babulja”, ka thënë se si trajner në këtë shou për talentë do të tërheqë drejt vetes ata të rinj që kanë shpirtin e aventurës si vet ai. Salihu zbulon disa sekrete për veten dhe spektaklin që do të prezantohet nga Ledion Liço e që nis transmetimin më 3 tetor në ekranin e “Top Channel”.
“Është nder i madh ftesa që mora për ‘The Voice’. Për mua, kjo do të thotë se puna ime ndër vite nuk ka shkuar pa u vënë re. Është po ashtu përgjegjësi e madhe dhe do të mundohem të jap më të mirën nga vetja. Më pëlqen shumë si përvojë”, ka deklaruar Genci për Panorama Plus duke folur rreth pjesëmarrjes në spektaklin që nis transmetimin më 3 tetor në ekranin e Top Channel.
“Jam i vetëdijshëm se në krahasim me kolegët e mi të panelit, publiku më njeh më pak. Megjithatë, mendoj se kjo i ka edhe të mirat e veta, sepse më jep një mundësi që të komunikoj me publikun nga e para dhe freskia e kësaj është frymëzuese”.
“Besoj se konkurrentët të cilët janë më aventurierë, që duan të eksperimentojnë më shumë dhe janë të thelluar në fushat më të majta, alternative të muzikës, do të jenë të prirë të më zgjedhin mua. Arma ime? Vështirë të përkufizohet, varet nga rasti në rast. Secili konkurrent e ka atë butonin e vet që duhet t’ia gjej. Së pari të fillojmë me butonin e karriges”, ka shtuar këngëtari. /Telegrafi/
