Autoriteti i Mediave Audiovizive kazhvilluar sot procedurën e shortit për caktimin e Numrit Logjik të Programit (NLP), përkatësisht nr. 4 dhe 5, për subjektet televiziv Tv Klan dhe Top Channel.
“Në zbatim të rregullores “Për përcaktimin e kritereve dhe procedurave për renditjen e shërbimeve audio dhe/ose audiovizive që mbështeten në rrjete numerike”, miratuar me vendimin e Autoritetit të Mediave Audiovizive (AMA), nr. 218, datë 12.10.2016, i ndryshuar, në mjediset e AMA-s, u zhvillua në datën 18 tetor 2017 procedura e shortit për caktimin e Numrit Logjik të Programit (NLP).
Numrat Logjikë të Programit, për të cilat u zhvillua procedura e shortit, ishin NLP 4 dhe NLP 5. Subjektet që u ftuan për të marrë pjesë në procedurën e shortit ishin shoqëritë “TV Klan” sh.a., dhe “Top Channel” sh.a., subjektet e vetme të licencuara si operatorë privatë kombëtare analogë me karakter gjeneralist.
Procedura e shortit u krye prej Komisionit të Vlerësimit për dhënien e numrit logjik të programit i përbërë prej Zëvendëskryetarit të AMA-s, në cilësinë e Kryetarit.
Në hedhjen e shortit u paraqit vetëm përfaqësuesi i shoqërisë “TV Klan” sh.a. Komisioni i Vlerësimit në zbatim të nenit 15 të rregullores së sipërcituar, i cili përcakton se: ”…Mungesa e përfaqësuesve të OSHMA nuk do të pengojë vazhdimin e procedurës së shortit”, vendosi të zhvillojë procedurën. Kryetari i AMA-s, sikurse përcaktohet në procedurë, caktoi anëtarin më të vjetër në moshë të Komisionit të Verësimit, për tërheqjen e shortit për shoqërinë “Top Channel” sh.a.
Fillimisht, në prani të anëtarëve të Komisionit dhe të pjesëmarrësve, në njërën vazo, në dy gogla jo transparente, u vendosën emrat e subjekteve pjesëmarrëse në short, ndërsa në vazon tjetër, po në dy gogla u vendosën Numrat Logjikë të Programit NLP 4 dhe NLP 5. Në vijim u zhvillua procedura e para-shortit për të caktuar radhën e tërheqjes së goglave prej subjekteve, ku rezultoi se i pari që do të tërhiqte numrin e NLP-së ishte shoqëria “TV Klan” sh.a.
Përfaqësuesi i këtij subjekti tërhoqi NLP 4, ndërsa anëtari i Komisionit të Vlerësimit që tërhoqi për subjektin “Top Channel” sh.a., tërhoqi NLP 5.
Rezultatet e procedurës së mësipërme do t’i përcillen Këshillit të AMA-s, i cili në bazë të kuadrit legjislativ në fuqi do të miratojë Numrat Logjikë të Programit për këto subjekte. “
