Stina e verës është një periudhë shumë e rëndësishme për këngëtarët, të cilët nxitojnë të nxjerrin projektet dhe t’i kthejnë në hite të verës. Gjë e cila përkthehet në më shumë “views”, koncerte, të ardhura dhe sigurisht sukses.
Edhe pse këtë vit industria muzikore dhe e koncerteve ka marrë një goditje të rëndë nga pandemia e koronavirusit, duket se artistët nuk do të ndalen dhe janë duke bërë planet për hitet e verës. Një prej bashkëpunimeve që mezi pritet nga publiku është ai i Alban Skënderajt dhe Elgit Dodës.
Ka qenë vetë Albani që e ka konfirmuar sot me anë të një postimi në Instagram këngën që po vjen. Ai premton se kënga që mban emrin “Parajsa ime” do të jetë kolona zanore e kësaj vere dhe se “do e dëgjojnë derisa të na vijë në majë të hundës”.
Foton nga dollia për hitin e rradhës e ka publikuar edhe Elgiti. Duket se dyshja e artistëve, ndryshe nga sa thamë më lart nuk e ka marrë fare me nxitim publikimin e këngës dhe po presin kohën e tyre.
Bashke me ta po presim edhe ne. E mira do ishte që mos prisnim shumë gjithsesi, se vera erdhi.
