Pak orë përpara finales së madhe të edicionit të pestë të “Dancing With The Stars” në portalin online të Revista Anabel është hedhur një artikull që flet për këtë spektakël. Dhe më konkretisht flitet për mungesën e fitueses së vitit të kaluar në finalen e këtij edicioni, e cila nuk ishte ftuar. Gjithashtu Revista Anabel jep detaje që sipas saj fituesit e edicioneve të kaluar të “Dancing…” nuk janë shpërblyer ashtu siç janë premtuar nga spektakli. Hidhen dyshime për marrjen e 50 mijë €-ve nga Oni Pustina, përflitet Jaguar-i i Enver Petrovcit dhe mosmarrja e apartamentit nga fituesja e edicionit të kaluar, Lori Hoxha.
E gjithë kjo ka sjell në një reagim të producentes së “Dancing…”, Holta Dulaku. Nëpërmjet një statusi në profilin e saj në Facebook ajo sqaron që e gjitha është një gjë e sajuar, duke akuzuar drejtpërdrejtë Dalina Buzin, kryeredaktoren e Revista Anabel, të cilën e quan një “gjë” pa gjini. Ajo ka reaguar duke kundërshtuar çdo fjalë të atij artikulli, të sajuara dhe pa të vërteta. Ndërsa për mos marrjen e apartamentit nga Lori Hoxha, Holta justifikohet se apartamenti vazhdon te jetë i Lorit, por ajo apo e ëma sulltaneshë nuk kanë patur kohë të marrin çelësat. E mbyll reagimin e saj me një ironi në drejtim të zonjës Vjollca Hoxha, e cila sipas Holtës duhet të marr apartamentin që të paktën ta shesë dhe të paktën me çerekun e lekëve të lante punonjësit e Top Channel për të gjithë votat e tyre me detyrim për pronaren gjatë kohës së spektaklit. Në komentet e statusit ka komentuar edhe fituesi i “Dancing… 1”, Oni Pustina, i cili bashkohet me reagimin e producentes Dulaku, duke shpjeguar se lekët e tij janë vonuar pak kohë për shkak se ka qenë jashtë vendit në atë kohë e pa asnjë arsye tjetër.
Që kur ka startuar edicioni i pestë i “Dancing With The Stars”, ky i fundit dhe njëkohësisht edhe producentja Dulaku janë sulmuar disa herë jo vetëm nga Revista Anabel, në mënyra krejt të tërthorta. Për shkak të largimeve të fillimit shumë media online apo print konkurente janë përpjekur të përfitojnë nga rasti. Nuk kanë munguar edhe provokimet e tërthorta edhe nga konkurenca e drejtpërdrejtë. Gjithsesi, Dulaku mbrëmjen e djeshme ka mbyllur me sukses edhe një edicion tjetër të patentës së suksesshme të BBC, për të vazhduar një aventurë tjetër televizive pas pak javësh me “Tu Si Que Vales”.
IMA / S. Dema
